രാജ്യത്തെ ഡിജിറ്റൽ സാന്പത്തിക വിപ്ലവത്തിന്‍റെ നട്ടെല്ലായി യുപിഐ മാറിക്കഴിഞ്ഞിരിക്കുന്നു. വ്യാപാരി ഇടപാടുകൾക്ക് മെർച്ചന്‍റ് ഡിസ്കൗണ്ട് റേറ്റ് (എംഡിആർ) ഏർപ്പെടുത്താനുള്ള നീക്കം സ്വർണ വ്യാപാര മേഖലയെ സംബന്ധിച്ചിടത്തോളം ഗൗരവമായി കാണേണ്ട വിഷയമാണ്. ഇത് സ്വർണ വ്യാപാരികൾക്ക് അധിക സാന്പത്തിക ബാധ്യത വരുത്തിവയ്ക്കുകയും ചെയ്യുന്നത്.
സാമ്പത്തിക ബാധ്യത ഉയരും
ഉയർന്ന മൂല്യമുള്ള ഇടപാടുകൾ കൂടുതലായി നടക്കുന്ന സ്വർണാഭരണ മേഖലയിൽ ഇതിന്‍റെ സാന്പത്തിക പ്രത്യാഘാതം സാധാരണ റീട്ടെയിൽ വ്യാപാരത്തേക്കാൾ ശക്തമായിരിക്കും.
2,000 രൂപയ്ക്കു മുകളിലുള്ള നിശ്ചിത യുപിഐ വ്യാപാരി ഇടപാടുകൾക്ക് 0.4 ശതമാനം എംഡിആർ ഈടാക്കാനാണ് നീക്കം. 50,000 രൂപയുടെ ഒരു ഇടപാടിന് 200 വരെയും 75,000നു മുകളിലുള്ള ഇടപാടിന് പരമാവധി 300 വരെയും സർവീസ് ചാർജ് നല്കേണ്ടിവരും.
ഒരു ജ്വല്ലറിയിൽ ദിവസേന നിരവധി ഉയർന്ന മൂല്യമുള്ള യുപിഐ ഇടപാടുകളാണ് നടക്കുന്നത്. മാസാവസത്തോടെ ഈ സർവീസ് ചാർജ് ഒരു വലിയ തുകയായി മാറും. ദിവസേനയുള്ള നൂറുകണക്കിന് ഇടപാടുകളിലേക്ക് ഈ ചെലവ് വ്യാപിക്കുന്പോൾ, പ്രത്യേകിച്ച് ചെറുകിട-ഇടത്തരം ജ്വലറികളുടെ പ്രവർത്തനച്ചെലവിനെയും ലാഭത്തെയും അതിന്‍റെ സ്വാധീനം വ്യക്തമായി പ്രതിഫലിക്കും.
ഭാരം വ്യാപാരികൾക്ക്
നിയമപ്രകാരം ഉപഭോക്താവിൽനിന്ന് എംഡിആർ നേരിട്ട് ഈടാക്കാൻ സാധിക്കില്ല. അതിനാൽ ഇതിന്‍റെ സാന്പത്തിക ഭാരം പൂർണമായും വ്യാപാരിയുടെ മേൽ തന്നെയാണ് വരുന്നത്.
ജിഎസ്ടി, ഹാൾമാർക്കിംഗ്, ഹാൾമാർക്ക് യൂണിക് ഐഡന്‍റിഫിക്കേഷൻ, ബാങ്കിംഗ്, സുരക്ഷ, ജീവനക്കാരുടെ വേതനം തുടങ്ങി നിരവധി ചെലവുകളും നിയന്ത്രണങ്ങളും നേരിടുന്ന മേഖലയാണ് സ്വർണ വ്യാപാരം. അതിനൊപ്പം ഡിജിറ്റൽ പേമെന്‍റിനും അധിക ചെലവ് ചുമത്തുന്നത് വ്യാപാര മേഖലയ്ക്ക് പുതിയൊരു സാന്പത്തിക ചെലവ് സൃഷ്ടിക്കും.
സാധാരണ റീട്ടെയിൽ വ്യാപാരം പോലെയല്ല സ്വർണ വ്യാപാരം. ഇവിടെ ഇടപാട് മൂല്യം വളരെ കൂടുതലാണ്. ഒരേ എംഡിആർ നിരക്ക് എല്ലാ വ്യാപാര മേഖലകൾക്കും ഒരുപോലെ ബാധകമാക്കുന്നത് പ്രായോഗികമായി നീതീകരിക്കാനാകില്ല.
ഡിജിറ്റൽ ഇന്ത്യക്കു പ്രോത്സാഹനമല്ല
രാജ്യത്ത് ഡിജിറ്റൽ പേമെന്‍റുകൾ പ്രോത്സാഹിപ്പിക്കാനും സുതാര്യമായ വ്യാപാരം ഉറപ്പാക്കാനും സർക്കാർ ശ്രമിക്കുന്ന ഘട്ടത്തിലാണ് യുപിഐ ഉപയോഗിക്കുന്ന വ്യാപാരികൾക്ക് അധിക ചെലവ് ഉയരുന്നത്.
ഡിജിറ്റൽ ഇടപാടുകളിലേക്ക് വ്യാപാരികളെ മാറ്റുന്നതിനുള്ള പ്രോത്സാഹനത്തിനു വിരുദ്ധമായ സന്ദേശമാണ് ഇത് നൽകുന്നത്.
ഡിജിറ്റൽ ഇന്ത്യയുടെ ലക്ഷ്യങ്ങൾ മുന്നോട്ടുകൊണ്ടുപോകുന്നതിനൊപ്പം ഡിജിറ്റൽ പേയ്മെന്‍റ് സ്വീകരിക്കുന്ന വ്യാപാരികൾക്ക് അനാവശ്യ സാന്പത്തിക ബാധ്യത ഉണ്ടാകാത്ത തരത്തിലുള്ള നയമാണ് വേണ്ടത്.
പരിഹാരമാർഗങ്ങൾ
സ്വർണാഭരണ വ്യാപാര മേഖലയിൽ ഉയർന്ന മൂല്യമുള്ള യുപിഐ ഇടപാടുകൾക്ക് എംഡിആർ ഒഴിവാക്കുകയോ, ഈ മേഖലയ്ക്ക് പ്രത്യേക ഇളവ് അനുവദിക്കുകയോ ചെയ്യുക. യുപിഐ വ്യാപാരത്തിന് സൗകര്യമാകണം; അല്ലാതെ അധിക സാന്പത്തിക ബാധ്യതയാകരുത്. സ്വർണ വ്യാപാര മേഖലയിലെ ഉയർന്ന മൂല്യമുള്ള ഡിജിറ്റൽ ഇടപാടുകൾക്ക് പ്രത്യേക പരിഗണന നൽകേണ്ട സമയം ഇതാണ്.
(കേരള ഗോൾഡ് ആൻഡ് സിൽവർ മർച്ചന്‍റ്സ് അസോസിയേഷൻ ജനറൽ
സെക്രട്ടറിയാണ് ലേഖകൻ)
Deepika
Corehub Solutions
E-paper LOGIN
LOGIN
