ബംഗളൂരു: രാജ്യത്തു രൂക്ഷമായ തൊഴിൽക്ഷാമം നിലനിൽക്കുന്നുണ്ടെന്ന് തുറന്നുസമ്മതിച്ച് കേന്ദ്ര വൻകിട വ്യവസായ മന്ത്രി എച്ച്.ഡി. കുമാരസ്വാമി.
കർണാടക പബ്ലിക് സർവീസ് കമ്മിഷൻ (കെപിഎസ്‌്സി) നിയമന തട്ടിപ്പുകളുമായി ബന്ധപ്പെട്ട് ബംഗളൂരുവിൽ യുവാക്കളുമായി നടത്തിയ സംവാദത്തിലാണ് അദ്ദേഹം ഇക്കാര്യം വ്യക്തമാക്കിയത്.
കൂടുതൽ യുവാക്കൾക്ക് അവസരം ഉറപ്പാക്കാൻ സർക്കാർ ജീവനക്കാരുടെ സർവീസ് കാലാവധി നിലവിലെ 35 വർഷത്തിൽനിന്ന് 15-20 വർഷമായി കുറയ്ക്കണമെന്നും അദ്ദേഹം നിർദേശിച്ചു.
ലക്ഷക്കണക്കിന് തൊഴിലവസരങ്ങൾ സൃഷ്‌ടിക്കുന്നതിനെക്കുറിച്ച് നമ്മൾ സംസാരിക്കുന്നുണ്ടെങ്കിലും യാഥാർഥ്യം മറിച്ചാണെന്ന് കുമാരസ്വാമി പറഞ്ഞു. ആയിരക്കണക്കിന് എൻജിനിയറിംഗ് ബിരുദധാരികൾക്കു ജോലിയില്ല. ഇലക്‌ട്രോണിക്സ്, കംപ്യൂട്ടർ, മെക്കാനിക്കൽ, എഐ ബിരുദധാരികളടക്കം ദിവസവും അന്പതോളം യുവാക്കൾ ജോലി അഭ്യർഥിച്ച് എന്നെ സമീപിക്കാറുണ്ട്. വൻ തുക ഡൊണേഷൻ നൽകി പഠിച്ചിറങ്ങിയ ഗ്രാമീണമേഖലകളിൽനിന്നുള്ള യുവാക്കളും ഇതിൽപ്പെടും -കുമാരസ്വാമി വ്യക്തമാക്കി.
ഓരോ കുടുംബത്തിലും കുറഞ്ഞത് ഒരാൾക്കെങ്കിലും സർക്കാർ ജോലി ഉറപ്പാക്കുന്നതിനായി ജീവനക്കാരുടെ സർവീസ് കാലാവധി 10, 15 അല്ലെങ്കിൽ 20 വർഷമായി പരിമിതപ്പെടുത്തുന്ന കാര്യം പൊതുസമൂഹം ചർച്ച ചെയ്യണമെന്ന് കുമാരസ്വാമി ആവശ്യപ്പെട്ടു.
Deepika
Corehub Solutions
E-paper LOGIN
LOGIN
