ഐക്യരാഷ്‌ട്രസഭ വിഭാവനം ചെയ്ത സുസ്ഥിര വികസന ലക്ഷ്യങ്ങളുടെ ചുവടുപിടിച്ച് അടിസ്ഥാന സൗകര്യങ്ങളെ വിലയിരുത്തി, കേന്ദ്ര പഞ്ചായത്തീരാജ് മന്ത്രാലയത്തിന്‍റെ പുരസ്കാരം നേടിയ മേലുകാവിന്‍റെ വികസനത്തിന് അടിത്തറ പാകിയ ഹെൻറി ബേക്കർ ജൂനിയറിന്‍റെ ചരമവാർഷിക ദിനമാണ് ഇന്ന്.
1878 നവംബർ 13ന് 59-ാം വയസിലായിരുന്നു അദ്ദേഹത്തിന്‍റെ മരണം. മലമ്പനി പിടിപെട്ടതുമായി ബന്ധപ്പെട്ട ആരോഗ്യപ്രശ്നങ്ങൾമൂലം ചെന്നൈയിലായിരുന്നു അന്ത‍്യം.
മൃതദേഹം മദ്രാസ് സെന്‍റ് ജോർജസ് സിഎസ്ഐ കത്തീഡ്രൽ സെമിത്തേരിയിൽ സംസ്കരിച്ചു. ഇംഗ്ലണ്ടിൽനിന്നു സുവിശേഷവുമായി കേരളത്തിൽ എത്തിയ ഹെൻറി ബേക്കർ സീനിയർ- അമീലിയ ഡോറോത്തിയ കോൾഹോഫൻ ദമ്പതിമാരുടെ മൂത്തമകനായി 1819 ജൂൺ 14നായിരുന്നു ഹെൻറി ബേക്കർ ജൂനിയറിന്‍റെ ജനനം.
പത്തൊൻപതാം നൂറ്റാണ്ടിന്‍റെ മധ്യത്തിൽ ബാഹ്യലോകവുമായി യാതൊരു ബന്ധവുമില്ലാതെ കാടുകളാൽ ചുറ്റപ്പെട്ടുകിടന്ന മേലുകാവിനെ ഇന്നത്തെ പ്രബുദ്ധതയിലേക്കും വികസനത്തിലേക്കും നയിച്ചതിനു പിന്നിൽ ഹെൻറി ബേക്കർ ജൂനിയർ മിഷനറിയുടെ ദീർഘവീക്ഷണവും കഠിനാധ്വാനവുമുണ്ട്.
അടിച്ചമർത്തപ്പെട്ടവരും പാർശ്വവത്കരിക്കപ്പെട്ടവരുമായ ജനവിഭാഗങ്ങൾ ആദിവസിച്ചിരുന്ന പ്രദേശമായിരുന്നു മേലുകാവ്. മലയരയ സമുദായത്തിൽപെട്ട ഈ ജനങ്ങൾ ക്രൂരമായ ചൂഷണങ്ങൾക്കും അവഗണനകൾക്കും ഇരയായി. കാട്ടുമൃഗങ്ങളോടും പ്രകൃതിയോടും പൊരുതി ജീവിച്ച ഇവർക്ക് അക്കാലത്ത് ഭരണകൂടങ്ങളിൽനിന്നോ മറ്റ് പ്രബല സമുദായങ്ങളിൽനിന്നോ യാതൊരു പിന്തുണയും ലഭിച്ചിരുന്നില്ല.
ഈ സാഹചര്യത്തിലാണ് അഞ്ച് മലകളിലെ അരയന്മാരുടെ തലവന്മാർ 1848ൽ മേലുകാവിൽനിന്നു പല പ്രാവശ്യം കാൽനടയായി യാത്ര ചെയ്ത് കോട്ടയത്തിനടുത്തു പള്ളത്തെത്തി “ഞങ്ങളെ പഠിപ്പിക്കണമേ, ഞങ്ങളെ രക്ഷിക്കണമേ!” എന്ന് ഹെൻറി ബേക്കറിനോട് അപേക്ഷിച്ചു. ഇവരുടെ അഭ്യർഥന മാനിച്ച് കാട്ടുപാതകളിലൂടെ ദീർഘദൂര യാത്ര ചെയ്ത് വന്യമൃഗങ്ങളും ദുർഘടമായ പാതകളും നിറഞ്ഞ മേലുകാവിലേക്ക് അദ്ദേഹം കടന്നുവന്നു. അക്കാലത്ത് മേലുകാവ് വനപ്രദേശങ്ങളിൽ മലമ്പനിയുടെ വ്യാപനവും വന്യമൃഗങ്ങളുടെ ആക്രമണവും തൊട്ടപ്പുഴുവിന്‍റെ ശല്യവുമെല്ലാം വളരെ രൂക്ഷമായിരുന്നു.
മേലുകാവിലെത്തിയ ഹെൻറി ബേക്കർ ജൂനിയർ അധികം താമസിയാതെ ഭാര്യ ഫ്രാൻസസ് ആൻ കിച്ചിനെയും കുട്ടികളെയും കൂടെ കൊണ്ടുവന്നു. കേവലം മതപ്രചാരണം മാത്രമല്ല അദ്ദേഹം ലക്ഷ്യമിട്ടത്. അന്ധവിശ്വാസങ്ങളിലും അനാചാരങ്ങളിലും ഉഴറിയിരുന്ന ഒരു ജനതയെ അറിവിന്‍റെ വെളിച്ചത്തിലേക്കു നയിക്കുക എന്നതായിരുന്നു അദ്ദേഹത്തിന്‍റെ പ്രധാന ദൗത്യം.
ജന്മിത്വവ്യവസ്ഥിതിയുടെയും ഉദ്യോഗസ്ഥരുടെയും ക്രൂരമായ വെട്ടിപ്പുകളിൽനിന്നു മലയോര ജനതയെ സംരക്ഷിക്കാൻ അദ്ദേഹം മുന്നിട്ടിറങ്ങി. മനുഷ്യരെ കന്നുകാലികളെപ്പോലെ വിറ്റിരുന്ന അക്കാലത്ത്, മനുഷ്യത്വത്തിന്‍റെ സന്ദേശവുമായി അദ്ദേഹം ജനങ്ങൾക്കിടയിൽ പ്രവർത്തിച്ചു. താഴെത്തട്ടിലുള്ള ജനങ്ങൾക്ക് വസ്ത്രം ധരിക്കാനും അന്തഃസോടെ ജീവിക്കാനുള്ള അവകാശം അദ്ദേഹം നേടിക്കൊടുത്തു. മലനാട്ടിലെ മനുഷ്യരുടെ ദുഃഖത്തിലും സന്തോഷത്തിലും അദ്ദേഹവും കുടുംബവും പങ്കുചേർന്നു.
വിദ്യാഭ്യാസ രംഗത്തെ വിപ്ലവം
ഇന്ന് മേലുകാവ് ഗ്രാമപഞ്ചായത്ത് വിദ്യാഭ്യാസപരമായി മുൻപന്തിയിൽ നിൽക്കുന്നതിനും ഉയർന്ന സാക്ഷരതാ നിരക്ക് നിലനിർത്തുന്നതിനും അടിത്തറയിട്ടത് ഹെൻറി ബേക്കർ ജൂനിയറാണ്. കുട്ടികൾക്ക് അക്ഷരാഭ്യാസം നൽകാനായി അദ്ദേഹം കുടിപ്പള്ളിക്കൂടങ്ങളും പ്രൈമറി വിദ്യാലയങ്ങളും സ്ഥാപിച്ചു. ജാതിമത ഭേദമെന്യേ എല്ലാവർക്കും വിദ്യാഭ്യാസം ഉറപ്പാക്കി.
മേലുകാവിന്‍റെ വിദ്യാഭ്യാസ ചരിത്രത്തിലെ നാഴികക്കല്ലായ സിഎംഎസ് ഹയർ സെക്കൻഡറി സ്കൂളിന്‍റെ തുടക്കം ഹെൻറി ബേക്കറുടെ പ്രവർത്തനങ്ങളുടെ ഫലമായാണ്. വിദ്യാഭ്യാസ സ്ഥാപനങ്ങൾ പിൽകാല തലമുറകൾക്ക് അറിവ് പകരുകമാത്രമല്ല, സമൂഹത്തിന്‍റെ സാമൂഹിക ഘടനയെത്തന്നെ മാറ്റിമറിക്കുകയും ചെയ്തു. ഇവിടെ സൗജന്യമായി പ്രവർത്തിച്ചിരുന്ന പെൺകുട്ടികൾക്കായുള്ള ബഥേൽ ആശ്രമം ബോർഡിംഗ് ഹോം, പോളിയോ ഹോം, ഡേകെയർ സെന്‍റർ എന്നിവ ഇത്തരുണത്തിൽ സ്മരണീയമാണ്.
കാർഷികരംഗത്തെ വിപ്ലവം
ഒരു ആത്മീയ നേതാവ് എന്നതിനപ്പുറം മികച്ചൊരു കർഷകൻ കൂടിയായിരുന്നു അദ്ദേഹം. മലയോര മണ്ണിൽ കാപ്പി, തേയില തുടങ്ങിയ നാണ്യവിളകൾ കൃഷി ചെയ്യാനുള്ള സാങ്കേതിക വിദ്യകളും അറിവുകളും അദ്ദേഹം നാട്ടുകാർക്ക് പകർന്നുനൽകി. ഇത് ജനങ്ങളുടെ സാമ്പത്തിക സുരക്ഷിതത്വം വർധിപ്പിച്ചു. വന്യമൃഗങ്ങൾ നിറഞ്ഞ കാട്ടിലൂടെ കാട്ടുപാതകൾ വെട്ടിഉണ്ടാക്കി സമീപ നഗരങ്ങളുമായി ബന്ധിപ്പിക്കുന്ന റോഡുകളാക്കി മാറ്റുവാൻ അദ്ദേഹം മുൻകൈ എടുത്തു. ഇത് മേലുകാവിന്‍റെ വ്യാപാര-വാണിജ്യ മേഖലകൾക്ക് ജീവൻ നൽകി. വേദശാസ്ത്രം, വൈദ്യശാസ്ത്രം എന്നിവ അഭ്യസിച്ച അദ്ദേഹം മലയോരജനതയ്ക്കു നല്ലൊരു വൈദ്യൻ കൂടിയായിരുന്നു.
ഹെൻറി ബേക്കർ കൊളുത്തിയ ആത്മീയവും സാമൂഹികവുമായ വെളിച്ചത്തിന്‍റെ തുടർച്ചയാണ് ഇന്നത്തെ മേലുകാവ്. 1983 ഏപ്രിൽ 30നു രൂപം കൊണ്ട സിഎസ്ഐ ഈസ്റ്റ് കേരള മഹാഇടവകയുടെ ആസ്ഥാനമായി മേലുകാവ് മാറി. ഇവിടത്തെ ‘ക്രൈസ്റ്റ് കത്തീഡ്രൽ പള്ളി’ ഹെൻറി ബേക്കറുടെ ദൗത്യങ്ങളുടെയും ഓർമകളുടെയും പ്രതീകമായി ഇന്ന് നിലകൊള്ളുന്നു. അദ്ദേഹത്തിന്‍റെ പേരിൽ സ്ഥാപിക്കപ്പെട്ട ഹെൻറി ബേക്കർ കോളജ് ഇന്ന് ഈ മലയോര ജനതയ്ക്ക് ഉന്നതവിദ്യാഭ്യാസം നൽകി വെളിച്ചം പകരുന്നു.
ഇന്ന് മേലുകാവ് പഞ്ചായത്ത് ദേശീയതലത്തിൽ മികച്ച അടിസ്ഥാന സൗകര്യ വികസനത്തിനുള്ള പുരസ്കാരം നേടി നിൽക്കുമ്പോൾ, അതിന് നൂറ്റാണ്ടുകൾക്ക് മുൻപ് വിത്തുപാകിയ നവോത്ഥാന നായകൻ ഹെൻറി ബേക്കർ ജൂനിയർ മണ്ണും മനുഷ്യനും ഉള്ളിടത്തോളം കാലം കൃതജ്ഞതയോടെ സ്മരിക്കപ്പെടും.
Deepika
Corehub Solutions
E-paper LOGIN
LOGIN
