തിരുവനന്തപുരം: രണ്ടു മാസം മുമ്പ് ഓപറേഷൻ സൗന്ദര്യ എന്ന പേരിൽ ഡ്രഗ്സ് കണ്ട്രോൾവകുപ്പു നടത്തിയ റെയ്ഡിൽ 10 ലക്ഷത്തോളം രൂപയുടെ വ്യാജസൗന്ദര്യ വസ്തുക്കൾ പിടിച്ചെടുത്തിരുന്നു. ചില ലിപ്സ്റ്റിക്, ഫേസ് ക്രീം സാന്പിളുകളിൽ അനുവദനീയമായതിനേക്കാൾ കൂടുതൽ മെർക്കുറിയുടെ അംശവും കണ്ടെത്തി. ഇതു വൃക്കകളിൽ അടക്കം ഗുരുതര രോഗങ്ങൾക്ക് ഇടയാക്കുമെന്നു മുന്നറിയിപ്പും നൽകിയിരുന്നു.
കോസ്മെറ്റിക്സ് റൂൾസ് 2020 പ്രകാരം മാനദണ്ഡം പാലിക്കാത്തതും മതിയായ കോസ്മെറ്റിക്സ് നിർമാണ ലൈസൻസുകളില്ലാതെ നിർമിച്ചു വിതരണം ചെയ്തതും നിയമപരമായ വ്യവസ്ഥകൾ പാലിക്കാതെ വിപണിയിൽ എത്തിച്ചതുമായ സൗന്ദര്യവർധക വസ്തുക്കളാണ് പിടിച്ചെടുത്തത്. കൗമാര പ്രായക്കാരിലും കുട്ടികളിലും ഫേസ് ക്രീമുകളുടെ അമിത ഉപയോഗവുമായി ബന്ധപ്പെട്ട ആരോഗ്യപ്രശ്നങ്ങൾ വ്യാപകമാണെന്നു കണ്ടെത്തിയ സാഹചര്യത്തിലായിരുന്നു പരിശോധന. സാന്പിളുകൾ ശേഖരിച്ച് ഗുണനിലവാര പരിശോധനയ്ക്കായി വകുപ്പിന്റെ തിരുവനന്തപുരം, എറണാകുളം ഡ്രഗ്സ് ടെസ്റ്റിംഗ് ലബോറട്ടറികളിലേക്ക് അയച്ചു.
ബേബി പൗഡർ, ബേബി സോപ്പ്, ബേബി ഓയിൽ തുടങ്ങിയവ ആരോഗ്യപ്രശ്നങ്ങൾ ഉണ്ടാക്കുന്ന സാഹചര്യം നിലവിലുള്ളതായി പരിശോധനയിൽ കണ്ടെത്തിയിരുന്നു. മുഖചർമം വെളുപ്പിക്കാനുള്ള ക്രീമുകളുടെ അമിതവും ദീർഘകാലവുമായ ഉപയോഗം ഗുരുതര ആരോഗ്യ പ്രശ്നങ്ങൾക്ക് ഇടയാക്കുമെന്നും കണ്ടെത്തി. നിർമാതാവിന്റെ പേരും പൂർണ വിലാസവും ഇവയിൽ അടങ്ങിയിട്ടുള്ള ഘടകങ്ങളുടെ വിവരവും ലേബലിൽ രേഖപ്പെടുത്തിയിട്ടുണ്ടോ എന്ന് ഉറപ്പാക്കി വേണം സൗന്ദര്യവർധക വസ്തുക്കൾ വാങ്ങാനെന്നാണ് അധികൃതർ പറയുന്നത്. പരാതികൾ ഡ്രഗ്സ് കണ്ട്രോൾ വകുപ്പിന്റെ ടോൾ-ഫ്രീ ഹെല്പ്ലൈന്:1800-425-3182 മുഖേന നൽകാം.
ഓണ്ലൈനിൽ വിൽക്കുന്ന ക്രീമുകൾക്കു നിയന്ത്രണം കൊണ്ടുവരും: മന്ത്രി
മുഖകാന്തി വർധിപ്പിക്കാനായി ഓണ്ലൈനിൽ വിൽക്കുന്ന ക്രീമുകൾക്കു നിയന്ത്രണം കൊണ്ടുവരുന്ന കാര്യത്തിൽ തീരുമാനമെടുക്കുമെന്ന് ആരോഗ്യമന്ത്രി കെ. മുരളീധരൻ. ഇത്തരം ക്രീമുകൾക്കെതിരേ പരാതി കിട്ടുന്നതനുസരിച്ച് സർക്കാരിന്റെ ഭാഗത്തുനിന്നു നടപടിയുണ്ടാകും. ഇതു വാങ്ങുന്നവരും ഉപയോഗിക്കുന്നവരും ശ്രദ്ധിക്കണം.
പരാതി കിട്ടിയാൽ നടപടിയിലേക്കു പോകും. സർക്കാർ അംഗീകരിച്ച ക്രീമുകൾ മാത്രമേ വാങ്ങാവൂ എന്നും മന്ത്രി പറഞ്ഞു.