മുക്കം: രണ്ട് പതിറ്റാണ്ടോളം കാലം നിരവധി വിദ്യാര്ഥികള്ക്ക് ആശ്രയമായി പ്രവർത്തിച്ച ഐഎച്ച് ആർഡി കോളജിന്റെ പ്രവർത്തനം പുനരാരംഭിക്കാൻ നടപടിയാവുന്നു. ഇതിന്റെ ഭാഗമായി ഐഎച്ച്ആർഡി ഡയറക്ടർ, സി പാസ് ഡയറക്ടർ തുടങ്ങിയവർ സി.കെ. കാസിം എംഎൽഎയുടെ നേതൃത്വത്തിൽ സ്ഥലം സന്ദർശിച്ചു.
മന്ത്രി റോജി എം ജോണുമായി എംഎൽഎ നടത്തിയ ചർച്ചയുടെ അടിസ്ഥാനത്തിൽ മന്ത്രിയുടെ നിർദ്ദേശപ്രകാരമാണ് ഐഎച്ച്ആർഡി ഡയറക്ടർ ഡോ. എം.വി.രാജേഷ്, സിപാസ് ഡയറക്ടർ ജെയ്മോൻ ജേക്കബ് ഉൾപ്പെടെയുള്ളവർ സ്ഥലത്തെത്തിയത്.കെട്ടിടവും പരിസരവും ഏറെ നേരം പരിശോധിച്ച സംഘം പുതിയ കോഴ്സുകൾ ആരംഭിക്കുമെന്ന് ഉറപ്പും നൽകി.
ആധുനിക കാലഘട്ടത്തിന് അനുസൃതമായ കോഴ്സുകൾക്കാണ് പ്രാമുഖ്യം നൽകുന്നതെന്നും മെഡിക്കൽ രംഗത്തത് നഴ്സിംഗ് കോളേജ് ഉൾപ്പെടെ പരിഗണനയിലുണ്ടന്നും ഡയറക്ടർ ഡോ: എം.വി. രാജേഷ് പറഞ്ഞു. അടുത്ത വർഷത്തോടെ പുതിയ കോഴ്സ് പ്രതീക്ഷിക്കാമെന്നും ഇത്തരമൊരു സ്ഥാപനം നിലനിർത്തേണ്ടത് നാടിന്റെ ആവശ്യമാണന്നും സി.കെ കാസിം എംഎൽഎ പറഞ്ഞു.