13-ാം വയസില് മെസിയെ എഫ്സി ബാഴ്സലോണയുടെ അക്കാദമിയായ ലാ മാസിയയില് എത്തിച്ചപ്പോള് ആദ്യമായി കരാര് ഒപ്പുവച്ചത് ഹൊര്ഹെയായിരുന്നു. അതാകട്ടെ ഹോട്ടലിലെ ഒരു നാപ്കിന് പേപ്പറില്. അന്നുതുടങ്ങി ഇന്നുവരെ മെസിയുടെ മാനേജര്, ഏജന്റ് ആയിരുന്നു ഹൊര്ഹെ.
റൊസാരിയോയില് സ്റ്റീല് ഫാക്ടറി ജീവനക്കാരനായാണ് ഹോര്ഹെയുടെ തുടക്കം. മുത്തശ്ശി സെലിയയാണ് കൊച്ചുമകന് മെസിയെ ഫുട്ബോള് പരിശീലിപ്പിക്കണമെന്ന് ഹോര്ഹെയോട് ആവശ്യപ്പെട്ടത്. അങ്ങനെ, താന് കളിച്ചുവളര്ന്ന ഗ്രാന്ഡോളി ഫുട്ബോള് ക്ലബ്ബില് ഹൊര്ഹെ കുഞ്ഞു ലിയൊയെ എത്തിച്ചു.
ന്യൂവെല്സ് ഓള്ഡ് ബോയ്സില് കളിക്കുന്നതിനിടെ, 1997ല് മെസിക്കു വളര്ച്ചാ ഹോര്മോണിന്റെ അപര്യാപ്തയുണ്ടെന്നു ഡോക്ടര്മാര് കണ്ടെത്തി. ചികിത്സയ്ക്ക് മാസം 900 ഡോളര്. കുടുംബത്തിന്റെ ആകെവരുമാനത്തിന്റെ ഇരട്ടിയിലധികം. പ്രതീക്ഷകള് കണ്ണീരിനു വഴിമാറിയ കാലം.
എന്നാല്, സ്പെയിനിലെ ബാഴ്സലോണയിലുള്ള ബന്ധുക്കള് മെസിയെയും ഹൊര്ഹെയെയും അവിടേക്കു ക്ഷണിച്ചു. ബാഴ്സയില് യോഗ്യതയ്ക്കായി ശ്രമിക്കാനായിരുന്നു അത്. ബാഴ്സയുടെ ഫസ്റ്റ് ടീം ഡയറക്ടര് കാര്ലോസ് റെക്സാച്ച് മെസിയുടെ കളി കാണുകയും ട്രയല്സിനായി സ്പെയിനിലേക്കു ക്ഷണിക്കുകയും ചെയ്തു. അങ്ങനെ 13-ാം വയസില് മെസിയെ പൂര്ണമായി ബാഴ്സലോണ ഏറ്റെടുത്തു.
ഒറ്റമുറി ഫ്ളാറ്റ്
മെസി ലാ മാസിയയില് കളിച്ചുതുടങ്ങിയപ്പോള് ഹൊര്ഹെയുടെ ജീവിതം കഷ്ടതയിലായിരുന്നു. കുടുംബാംഗങ്ങള് അര്ജന്റീനയിലേക്കു മടങ്ങിയതോടെ ഹൊര്ഹെയും മെസിയും തനിച്ച് ഒറ്റമുറി ഫ്ളാറ്റില്.
അക്കാലത്ത് ഫുട്ബോള് കളിക്കണോ നാട്ടിലേക്കു മടങ്ങണോ എന്നതായിരുന്നു മെസിയോടുള്ള ഹൊര്ഹെയുടെ പ്രധാന ചോദ്യം. അപ്പോഴെല്ലാം ഫുട്ബോള് മതിയെന്നായിരുന്നു മെസിയുടെ മറുപടി.
മെസിക്കൊപ്പം ഹൊര്ഹെയും കുടുംബവും വളര്ന്നു. ഏജന്റാകാന് പലരും സമീപിച്ചെങ്കിലും ആ ഉത്തരവാദിത്വം ഹൊര്ഹെ ഏറ്റെടുത്തു. കരിയറിന്റെ ഉച്ചസ്ഥായിയിലെത്തി നില്ക്കുന്ന മെസിക്ക്, ഇനി അച്ഛന്റെ താങ്ങും തണലുമില്ല; റൊസാരിയോയിലെയും ഒറ്റമുറി ഫ്ളാറ്റിലെയുമെല്ലാം ഓര്മകള് മാത്രം...
Deepika
E-paper LOGIN
LOGIN
