പാലക്കാട്: ഭാരത സെൻസസ് 2027 ന്റെ ഭാഗമായി ജില്ലയിലെ ഫീൽഡ് ട്രെയിനർമാർക്കുള്ള പരിശീലന പരിപാടി സമാപിച്ചു. മൂന്ന് ദിവസങ്ങളിലായി മൂന്ന് ബാച്ചുകൾക്കാണ് പരിശീലനം നൽകിയത്.
സെൻസസ് ആശയങ്ങൾ, ഷെഡ്യൂളുകൾ, ഫീൽഡ് നടപടിക്രമങ്ങൾ എന്നിവയുടെ സമഗ്രമായ പരിചയപ്പെടുത്തലാണ് പരിശീലന ക്ലാസുകളിൽ പ്രതിപാദിച്ചത്.
പൂർണമായും ഡിജിറ്റൽ സംവിധാനങ്ങളിലേക്ക് മാറുന്ന സെൻസസ് നടപടികളുടെ ഭാഗമായി വിവരശേഖരണം, വെബ്സൈറ്റ്, മൊബൈൽ ആപ്പ് വഴിയുള്ള വിവരശേഖരണം എന്നിവയിൽ ട്രെയിനർമാർക്ക് പ്രത്യേക പരിശീലനം നൽകി.
കൂടാതെ സെൻസസിന്റെ ആദ്യഘട്ട പ്രവർത്തനങ്ങളെക്കുറിച്ചും ഭവനങ്ങളുടെ ലിസ്റ്റ് ശേഖരിക്കുന്നതിനെക്കുറിച്ചും ക്ലാസുകളിൽ വിശദമായ ചർച്ച നടന്നു.
തുടർന്ന് ട്രെയിനർമാർക്കുള്ള സർട്ടിഫിക്കറ്റ് വിതരണം അഡിഷണൽ ഡിസ്ട്രിക്റ്റ് സെൻസസ് ഓഫിസറും ആർഡിഒയുമായ അൻവർ സാദത്ത് നിർവഹിച്ചു. ജില്ലാ വ്യവസായ കേന്ദ്രത്തിൽ നടന്നപരിപാടിയിൽ ചിറ്റൂർ കോളജ് അസിസ്റ്റന്റ് പ്രൊഫസർ എൻ.എസ് ബ്രിജേഷ്, നാഷണൽ ട്രെയിനർ എൻ. സുരേഷ്, സെൻസസ് ഡയറക്ടറേറ്റിൽ നിന്നുള്ള പരിശീലക ഗായത്രി സുരേഷ് എന്നിവർ ക്ലാസിന് നേതൃത്വം നൽകി.സെൻസസ് നോഡൽ ഓഫീസർ പി.എ. ടോംസ് പങ്കെടുത്തു.