4

ഇന്ത്യയിലെ സ്ത്രീസുരക്ഷ എന്ന വിഷയം എന്നും വലിയ ചർച്ചകൾക്ക് വഴിയൊരുക്കാറുണ്ട്. എന്നാൽ ഒരു വിദേശ വനിതയ്ക്ക് നമ്മുടെ രാജ്യത്തെ നഗരങ്ങൾ എത്രത്തോളം സുരക്ഷിതമാണെന്ന അന്വേഷണം ചെന്നെത്തുന്നത് ഞെട്ടിക്കുന്നതും അതേസമയം ചിന്തിപ്പിക്കുന്നതുമായ ചില വസ്തുതകളിലേക്കാണ്.

അടുത്തിടെ ഇന്ത്യ സന്ദർശിച്ച അലീസ എന്ന റഷ്യൻ യുവതി സോഷ്യൽ മീഡിയയിലൂടെ പങ്കുവെച്ച തന്‍റെ യാത്രാനുഭവങ്ങൾ ഇപ്പോൾ ഇന്‍റർനെറ്റിൽ വലിയ തരംഗമായി മാറിയിരിക്കുകയാണ്. താൻ സന്ദർശിച്ച ഓരോ ഇന്ത്യൻ നഗരത്തിലും തനിക്ക് അനുഭവപ്പെട്ട സുരക്ഷയുടെ തോത് 10 ൽ എത്രയാണെന്ന് അവർ ഈ വീഡിയോയിലൂടെ വ്യക്തമാക്കുന്നു.

സാംസ്‌കാരിക പൈതൃകം കൊണ്ടും പ്രകൃതിഭംഗി കൊണ്ടും സഞ്ചാരികളെ ആകർഷിക്കുന്ന ഹിമാചൽ പ്രദേശിലെ മണാലിയും ഉത്തരാഖണ്ഡിലെ ഋഷികേശുമാണ് ഈ പട്ടികയിൽ ഒന്നാമത് നിൽക്കുന്നത്.

ഈ രണ്ട് സ്ഥലങ്ങൾക്കും 10 ൽ ഒൻപത് മാർക്കാണ് അവർ നൽകിയത്. വിനോദസഞ്ചാരികൾക്ക് ഏറ്റവും ആശ്വാസകരമായ അന്തരീക്ഷം ഒരുക്കുന്നതിൽ ഈ നഗരങ്ങൾ വിജയിച്ചുവെന്ന് അവരുടെ റേറ്റിംഗ് സൂചിപ്പിക്കുന്നു.

രാജസ്ഥാനിലെ ജയ്പൂരും ജോധ്പൂരും അതുപോലെ കടൽത്തീരങ്ങൾ കൊണ്ട് സമ്പന്നമായ ഗോവയും എട്ടിലും ഏഴിലും എത്തിനിൽക്കുമ്പോൾ രാജ്യതലസ്ഥാനമായ ഡൽഹിയുടെയും താജ്മഹലിന്‍റെ നഗരമായ ആഗ്രയുടെയും അവസ്ഥ പരിതാപകരമാണ്.

ഡൽഹിക്ക് വെറും രണ്ട് മാർക്ക് മാത്രമാണ് യുവതി നൽകിയിരിക്കുന്നത്. ലോകത്തിലെ തന്നെ പ്രധാനപ്പെട്ട വിനോദസഞ്ചാര കേന്ദ്രമായ ആഗ്രയ്ക്ക് ലഭിച്ചതാകട്ടെ വെറും മൂന്ന് മാർക്കും. വീഡിയോ വൈറലായതോടെ ഇന്ത്യക്കാരടക്കമുള്ള ലക്ഷക്കണക്കിന് ആളുകളാണ് പ്രതികരണങ്ങളുമായി രംഗത്തെത്തിയത്.

ഡൽഹിക്ക് നൽകിയ രണ്ട് മാർക്ക് പോലും കൂടുതലാണെന്നും അവിടുത്തെ സുരക്ഷാ സാഹചര്യം പരിഗണിക്കുമ്പോൾ അത് നെഗറ്റീവ് മാർക്കിലേക്ക് പോകേണ്ടതാണെന്നും പലരും കുറിച്ചു.

വിദേശികൾക്ക് മാത്രമല്ല, സ്വദേശികളായ സ്ത്രീകൾക്ക് പോലും ഡൽഹി സുരക്ഷിതമല്ലെന്ന യാഥാർഥ്യം സോഷ്യൽ മീഡിയ ഉപയോക്താക്കൾ വേദനയോടെ പങ്കുവെക്കുന്നുണ്ട്.

വടക്കുകിഴക്കൻ സംസ്ഥാനങ്ങൾ സന്ദർശിച്ചിരുന്നെങ്കിൽ അവിടെ സ്ത്രീകൾക്ക് പരിപൂർണ സുരക്ഷ ലഭിക്കുമായിരുന്നു എന്ന അഭിപ്രായവും ഇതിനോടൊപ്പം ഉയരുന്നുണ്ട്.

രാജ്യത്തെ പ്രധാന നഗരങ്ങളിലെ സുരക്ഷാ വീഴ്ചകളെക്കുറിച്ചും സ്ത്രീകൾ നേരിടുന്ന അസ്വസ്ഥതകളെക്കുറിച്ചും വിദേശ സഞ്ചാരിയുടെ ഈ തുറന്നുപറച്ചിൽ വലിയൊരു ചർച്ചയ്ക്ക് വഴിതെളിച്ചിരിക്കുകയാണ്.