കൊച്ചി: വിവാഹാഭ്യര്ഥന നിരസിച്ചതിനു കോഴിക്കോട് എന്ഐടിയിലെ ഗവേഷണ വിദ്യാര്ഥിനിയായിരുന്ന തിരുവനന്തപുരം കുമാരപുരം സ്വദേശിനി കെ. ഇന്ദുവിനെ ട്രെയിനില്നിന്നു തള്ളിയിട്ടു കൊന്നുവെന്ന കേസിലെ വിചാരണ ആരംഭിച്ചു.
ഇന്ദുവിന്റെ പിതാവ് കൃഷ്ണന് നായര്, അമ്മ ഓമന കുഞ്ഞമ്മ, മാതൃ സഹോദരി ബേബിക്കുട്ടിയമ്മ, ഭര്ത്താവ് ഗോപിനാഥന് നായര് എന്നിവരെ എറണാകുളം പ്രിന്സിപ്പല് സെഷന്സ് കോടതിയില് ഇന്നലെ വിസ്തരിച്ചു. പ്രോസിക്യൂഷന് വേണ്ടി സ്പെഷ്യല് പബ്ലിക് പ്രോസിക്യൂട്ടര് എം.എ. ജോസ് മണവാളന് ഹാജരായി.
ട്രെയിനില് വച്ച് 2011 ഏപ്രില് 25ന് പുലര്ച്ചെ രണ്ടിനായിരുന്നു സംഭവം. ഇന്ദുവിനൊപ്പം ട്രെയിനില് യാത്ര ചെയ്ത കോഴിക്കോട് എന്ഐടി അസി.പ്രഫസര് കെ.സുഭാഷിനെ ക്രൈംബ്രാഞ്ച് കൊലപാതക കുറ്റത്തിന് അറസ്റ്റ് ചെയ്തു.
തിരുവനന്തപുരത്തുനിന്ന് കോഴിക്കോട്ടേക്കു മംഗലാപുരം എക്സ്പ്രസില് യാത്ര ചെയ്യുന്നതിനിടയിലാണ് ഇന്ദുവിനെ കാണാതായത്. ആലുവ പുഴയില്നിന്ന് ഇന്ദുവിന്റെ മൃതദേഹം കണ്ടെത്തുകയായിരുന്നു. ആദ്യം ആത്മഹത്യയാണെന്ന് കരുതിയ മരണം വിശദ അന്വേഷണത്തിലാണ് കൊലപാതകമാണെന്നു കണ്ടെത്തിയത്.
ഇന്ദുവിന്റെ വിവാഹം അഭിഷേക് എന്നയാളുമായി ഉറപ്പിച്ചതിലുള്ള വിരോധമാണു കൊലപാതകത്തിലേക്ക് നയിച്ചതെന്നാണു പൊലിസ് കണ്ടെത്തല്.
തിരുവനന്തപുരത്തുനിന്ന് ഇന്ദുവുമായി ട്രെയിനില് കയറിയ സുഭാഷ് കോഴിക്കോട്ടെത്തി ഉടന് രജിസ്റ്റര് വിവാഹം കഴിഞ്ഞ് സിക്കിമിലേക്കു പോകണമെന്ന് ആവശ്യപ്പെട്ടു.
എന്നാല്, ഇന്ദു ആവശ്യം നിരസിച്ചതാണ് കൊലപാതകത്തിനു കാരണമായത്. സുഭാഷ് ഇന്ദുവിനെ ട്രെയിനില്നിന്ന് ആലുവ പാലത്തിനു മുകളില്വച്ച് പുഴയിലേക്കു തള്ളിയിട്ട് കൊലപ്പെടുത്തുകയായിരുന്നെന്നു കുറ്റപത്രത്തില് പറയുന്നു.
Deepika
E-paper LOGIN
LOGIN
