ന്യൂഡൽഹി: തെരഞ്ഞെടുപ്പു കമ്മിഷണര് ഗ്യാനേഷ് കുമാറിന്റെ രാജി ആവശ്യപ്പെട്ട് പ്രതിഷേധം ശക്തമാക്കാനൊരുങ്ങി പ്രതിപക്ഷ ഇന്ത്യാ സഖ്യം. ഇതിന്റെ ഭാഗമായി രാജ്യത്തുടനീളം അഞ്ച് മഹാറാലികള് നടത്തും.
ഈമാസം ആറിന് പ്രതിപക്ഷ പാര്ട്ടി എംപിമാര് തെരഞ്ഞെടുപ്പു കമ്മിഷന് ആസ്ഥാനത്തേക്ക് മാര്ച്ച് നടത്തുമെന്നും ഡൽഹിയിലെ കോൺസ്റ്റിറ്റ്യൂഷൻ ക്ലബ്ബിൽ നടന്ന ഇന്ത്യാസഖ്യം യോഗത്തിനുശേഷം നേതാക്കൾ വാര്ത്താസമ്മേളനത്തില് അറിയിച്ചു.
പ്രധാനമന്ത്രി നരേന്ദ്രമോദിയും ആഭ്യന്തരമന്ത്രി അമിത്ഷായും ചേര്ന്ന് തെരഞ്ഞെടുപ്പു കമ്മിഷനെ കളിപ്പാവയാക്കി മാറ്റിയെന്നും ഇക്കാര്യത്തില് ഒന്നിച്ചുനീങ്ങാനാണ് സഖ്യത്തിലെ എല്ലാ പാര്ട്ടികളും തീരുമാനിച്ചതെന്നും ഇവിഎമ്മിനു പകരം ബാലറ്റ് പേപ്പറുകളിലേക്കു മടങ്ങണമെന്നും യോഗതീരുമാനങ്ങൾ വിശദീകരിച്ച കോണ്ഗ്രസ് അധ്യക്ഷന് മല്ലികാര്ജുന് ഖാര്ഗെ പറഞ്ഞു.
ഭരണഘടനാസ്ഥാപനങ്ങള് കൈയടക്കുന്ന രീതിയെക്കുറിച്ച് രാഷ്ട്രപതിയെ ധരിപ്പിക്കുന്നതിനായി ഈമാസം രണ്ടാം വാരത്തില് പ്രതിപക്ഷനേതാക്കള് കൂടിക്കാഴ്ചയ്ക്ക് സമയം തേടും.
ഗ്യാനേഷ് കുമാറിന്റെ രാജി ആവശ്യപ്പെട്ട് ഗാന്ധിജയന്തി ദിനമായ നാളെമുതല് എട്ടുവരെ ഇന്ത്യാസഖ്യം രാജ്യത്തെ എല്ലാ ജില്ലകളിലും ജനാധിപത്യ സംരക്ഷണ മാർച്ച് സംഘടിപ്പിക്കും.
തെരഞ്ഞെടുപ്പു കമ്മിഷനെതിരേ സുപ്രീംകോടതിയെ സമീപിക്കുമെന്നും നവംബര് ഒന്നിന് ഡല്ഹിയിലെ രാംലീല മൈതാനത്ത് ജനാധിപത്യ സംരക്ഷണ റാലി നടത്തുമെന്നും ഗാർഗെ പറഞ്ഞു.
കോൺഗ്രസ് അധ്യക്ഷൻ മല്ലികാർജുൻ ഖാർഗെ, സോണിയ ഗാന്ധി, ലോക്സഭ പ്രതിപക്ഷനേതാവ് രാഹുൽ ഗാന്ധി, തൃണമൂൽ കോൺഗ്രസ് നേതാവ് മമത ബാനർജി എന്നിവർക്കുപുറമെ സമാജ്വാദി പാർട്ടി, സിപിഎം, സിപിഐ, എൻസിപി (ശരദ് പവാർ), ശിവസേന (യുബിടി) തുടങ്ങിയ 20 രാഷ്ട്രീയപാർട്ടികളുടെ പ്രമുഖ നേതാക്കളും സ്വതന്ത്ര രാജ്യസഭാ എംപി കപിൽ സിബലും യോഗത്തിൽ പങ്കെടുത്തു.
Deepika
E-paper LOGIN
LOGIN
