തിരുവനന്തപുരം: ക്രിസ്ത്യൻ ജനവിഭാഗങ്ങൾ നേരിടുന്ന വിവിധ പ്രശ്നങ്ങൾ പഠിക്കാൻ സർക്കാർ നിയോഗിച്ച ജസ്റ്റീസ് ജെ. ബി. കോശി കമ്മീഷൻ റിപ്പോർട്ട് പഠിച്ച ശേഷം അഭിപ്രായമറിയിക്കാമെന്ന് ക്രൈസ്തവ സഭകൾ.
കമ്മീഷൻ റിപ്പോർട്ടുമായി ബന്ധപ്പെട്ട് മുഖ്യമന്ത്രി പിണറായി വിജയൻ തിരുവനന്തപുരത്ത് വിളിച്ചുചേർത്ത വിവിധ ക്രിസ്ത്യൻ സഭാ പ്രതിനിധികളുടെ യോഗത്തിലാണ് ഇക്കാര്യം അറിയിച്ചത്. കമ്മീഷൻ റിപ്പോർട്ട് സംബന്ധിച്ച് ഇതുവരെ നടപ്പിലാക്കിയ ശിപാർശകൾ മുഖ്യമന്ത്രി യോഗത്തിൽ വിശദീകരിച്ചു. നിലവിൽ നടപ്പിലാക്കിയ കാര്യങ്ങൾ വെബ്സൈറ്റിൽ പ്രസിദ്ധീകരിക്കും.
കേന്ദ്ര-സംസ്ഥാന നയങ്ങളും വിവിധ നിയമങ്ങളും ചട്ടങ്ങളും പരിഷ്കരിച്ചാൽ മാത്രം നടപ്പിലാക്കാൻ കഴിയുന്നവയും കൂടുതൽ ആഴത്തിൽ പരിശോധന ആവശ്യമായവയുമാണ് കമ്മീഷൻ റിപ്പോർട്ടിൽ നടപ്പാക്കാൻ അവശേഷിക്കുന്നത്. എല്ലാ വിഭാഗങ്ങളെയും ചേർത്തുനിർത്താനും അവരുടെ പ്രശ്നങ്ങൾക്ക് പരിഹാരം കാണാനുമാണ് സർക്കാർ ശ്രമിച്ചുകൊണ്ടിരിക്കുന്നത്. വിവിധ വിഭാഗങ്ങളുടെ പ്രശ്നം രേഖാമൂലം നൽകണമെന്ന് മുഖ്യമന്ത്രി നിർദേശിച്ചു.
റിപ്പോർട്ട് പുറത്തുവിട്ട സർക്കാരിന്റെ നടപടിയെ സ്വാഗതം ചെയ്യുന്നതായി മലങ്കര കത്തോലിക്കാ സഭാ മേജർ ആർച്ച് ബിഷപ് കർദിനാൾ മാർ ബസേലിയോസ് ക്ലീമിസ് കാതോലിക്ക ബാവ യോഗത്തിൽ പറഞ്ഞു.
മന്ത്രിമാരായ പി. രാജീവ്, വി. അബ്ദുറഹ്മാൻ എന്നിവരും വിവിധ വകുപ്പ് സെക്രട്ടറിമാരും യോഗത്തിൽ സർക്കാരിനെ പ്രതിനിധീകരിച്ചു പങ്കെടുത്തു. വിവിധ ക്രൈസ്തവ സഭകളെ പ്രതിനിധീകരിച്ച് മോണ്. യൂജിൻ .എച്ച്. പെരേര, ഫാ. തോമസ് തറയിൽ, ഫാ. ജോണ് തെക്കേക്കര, ഗബ്രിയേൽ മാർ ഗ്രിഗോറിയോസ് മെത്രാപ്പോലീത്ത, മാത്യൂസ് മാർ സിൽവാനോസ് മെത്രാപ്പോലീത്ത, ബിഷപ് ഔഗേൻ കുര്യാക്കോസ്, ഫാ. സജി മേക്കാട്ട്, ലഫ്.കേണൽ ജേക്കബ് ജെ. ജോസഫ് തുടങ്ങിയവർ പങ്കെടുത്തു.