കൊച്ചി: നെടുമ്പാശേരിയില്‍ മൂന്നു പേരെ വാഹനമിടിച്ച് കൊലപ്പെടുത്തിയ കേസില്‍ പ്രതി സുഹൈല്‍ സജീവിനെ (19) ജുവനൈല്‍ ഹോമിലേക്ക് റിമാന്‍ഡ് ചെയ്തതില്‍ പരാതിയുമായി മരിച്ച വയനാട് സ്വദേശി ദേവികയുടെ കുടുംബം. ക്രിമിനല്‍ പശ്ചാത്തലം ഇല്ലെന്നും പ്രായം 19 വയസ് ആണെന്നും കണക്കിലെടുത്താണ് കോടതി പ്രതിയെ കാക്കനാട് ബോസ്റ്റല്‍ സ്‌കൂളിലേക്ക് അയച്ചത്.
ഇതിനെതിരെ ദേവികയുടെ കുടുംബം നെടുമ്പാശേരി പൊലിസില്‍ പരാതി നല്‍കി. സുഹൈലിനെതിരെ കൊലക്കുറ്റത്തിന് കേസ് എടുക്കണമെന്നും ദേവികയുടെ കുടുംബം ആവശ്യപ്പെട്ടു. അപകടം കരുതിക്കൂട്ടി ഉണ്ടാക്കിയതാണോ എന്ന് സംശയമുണ്ടെന്നും കുടുംബം ആരോപിച്ചു.
കഴിഞ്ഞ പിറന്നാളിന് മാതാപിതാക്കള്‍ സമ്മാനിച്ച മിനി കൂപ്പര്‍ കാറാണ് അമിത വേഗത്തില്‍ ഓടിച്ച് മൂന്നു ജീവനുകള്‍ എടുത്തത്. ഞായറാഴ്ച പുലര്‍ച്ചെ രണ്ടോടെയായിരുന്നു അപകടം. കര്‍ണാടക സ്വദേശി ഇയ്യാസ് (21), പാലക്കാട് സ്വദേശി ഗോപിക (21), വയനാട് സ്വദേശി ദേവിക (21) എന്നിവരാണ് മരിച്ചത്.
മൂവരും തൃക്കാക്കരയിലെ സുക്കോയ ക്രാഫ്റ്റ് ഷോപ്പിലെ ജീവനക്കാരായിരുന്നു. പാര്‍ട് ടൈം ജോലിക്കൊപ്പം കൊച്ചിയിലെ വിവിധ സ്ഥാപനങ്ങളില്‍ ഉപരിപഠനം നടത്തിവരികയായിരുന്നു മൂവരും. അതേസമയം, മിനി കൂപ്പറില്‍ പ്രതി സുഹൈലിനൊപ്പമുണ്ടായിരുന്ന മൂന്നു സുഹൃത്തുക്കളെ പ്രേരണ കുറ്റത്തിന് അറസ്റ്റ് ചെയ്തിട്ടുണ്ട്.
സിസിടിവി അടക്കം കേന്ദ്രീകരിച്ച് നടത്തിയ വിശദമായ അന്വേഷണത്തിലാണ് സുഹൈലിനൊപ്പം മറ്റു മൂന്നു പേര്‍ കൂടി ഉണ്ടായിരുന്നുവെന്ന് പൊലിസ് കണ്ടെത്തിയത്. മദ്യപിച്ച് അമിതവേഗതയില്‍ കാര്‍ ഓടിച്ചത് തടയാത്തതിനാണ് ഇവര്‍ക്കെതിരെ പ്രേരണാക്കുറ്റം ചുമത്തിയത്.
Deepika
Corehub Solutions
E-paper LOGIN
LOGIN
