കുടിയാന്മല: മലയോര മേഖലയിൽ കമ്യൂണിസ്റ്റ് പാർട്ടിയുടെ വളർച്ചക്ക് നേതൃത്വം നൽകിയ സിപിഎം കണ്ണൂർ ജില്ലാ സെക്രട്ടറിയേറ്റ് മുൻ അംഗവും കർഷകസംഘം സംസ്ഥാന മുൻ വൈസ് പ്രസിഡന്റും ദീർഘകാലം കർഷക സംഘം കണ്ണൂർ ജില്ലാ സെക്രട്ടറിയുമായിരുന്ന കൊന്നയ്ക്കൽ കെ.എം.ജോസഫ് (81) അന്തരിച്ചു.
സംസ്കാരം ഇന്ന് 12 ന് കുടിയാന്മലയിൽ. ഭാര്യ: തങ്കമ്മ കോട്ടയം തോട്ടക്കാട് ചക്കാലയിൽ കുടുംബാംഗം. മക്കൾ: സാജു ജോസഫ് (നടുവിൽ പഞ്ചായത്ത് മെംബർ), സാനി സാബു (ഇരിട്ടി സർവീസ് സഹകരണ ബാങ്ക്), സിനു ജോസഫ് (സ്റ്റേറ്റ് ഹെഡ്, ഇൻഡോസ്റ്റാർ കാപ്പിറ്റൽ, എറണാകുളം). മരുമക്കൾ: ലിനി തടത്തിൽപുത്തൻപുരയിൽ കൊട്ടിയൂർ (അഗ്രിക്കൾച്ചറൽ ബാങ്ക്, തളിപ്പറമ്പ്), അഡ്വ.സാബു വർഗീസ് വിത്തുപുരയിൽ (വള്ളിത്തോട്), ജെയ്സ്ന കുറ്റിക്കാട്ടുകുന്നേൽ (നെടുവോട്, അധ്യാപിക, സെന്റ് മേരീസ് കോൺവന്റ് സ്കൂൾ, എറണാകുളം). സഹോദരങ്ങൾ: കുട്ടിയമ്മ, അന്നമ്മ, ഏലമ്മ, ഇത്താമ്മ, കെ.എം.തോമസ്, വത്സ, ഫിലോമിന, പരേതരായ കെ.എം.മാത്യു, മേരി. 1970 കളുടെ ആരംഭത്തിൽ തന്നെ പാർട്ടിയിൽ സജീവമായ കെ.എം. ജോസഫ് അവിഭക്ത നടുവിൽ ലോക്കൽ സെക്രട്ടറി, തളിപ്പറമ്പ്-ശ്രീകണ്ഠപുരം ഏരിയാ കമ്മിറ്റിയംഗം, നടുവിൽ ഗ്രാമപഞ്ചായത്തംഗം എന്നീ നിലകളിൽ പ്രവർത്തിച്ചു. അടിയന്തരാവസ്ഥക്കാലത്ത് കുടിയാന്മലയിൽ സഖാവ് സുകുമാരൻ രക്തസാക്ഷി അനുസ്മരണ പരിപാടിയിൽ പങ്കെടുക്കാനെത്തിയ എം.വി. ഗോവിന്ദൻ, ഇ.പി. ജയരാജൻ എന്നിവരോടൊപ്പം പോലീസ് മർദനത്തിന് വിധേയനായ ഇദ്ദേഹം അറസ്റ്റ് ചെയ്യപ്പെട്ട് ജയിലിൽ അടയ്ക്കപ്പെട്ടു. മിസ തടവുകാരനായി ജയിൽ വാസവും അനുഷ്ഠിച്ചു. 2001 ൽ ആലക്കോട് ഏരിയാ കമ്മിറ്റി രൂപീകരണത്തിന് നേതൃത്വം നല്കിയ കെ.എം. ജോസഫ് ജില്ലാ സെക്രട്ടറിയേറ്റംഗമെന്ന നിലയിൽ ആലക്കോട് ഏരിയയിലെ പാർട്ടിയെ നയിച്ചു.
അവിഭക്ത തളിപ്പറമ്പ് പ്രഥമിക കാർഷിക ഗ്രാമവികസന ബാങ്ക് പ്രസിഡന്റ് എന്ന നിലയിലും സംസ്ഥാന കാർഷിക വികസന ബാങ്ക് ഭരണസമിതി അംമെന്ന നിലയിലും സഹകരണ മേഖലയിലും തന്റെ വ്യക്തിമുദ്ര പതിപ്പിച്ചു.