കൊല്ലം: കൊല്ലം കെ എസ് ആര്‍ ടിസി ഡിപ്പോയില്‍നിന്ന് ഇതര സംസ്ഥാന സര്‍വീസുകളടക്കം കൂടുതല്‍ ദീര്‍ഘദൂര സര്‍വീസുകള്‍ ആരംഭിക്കുമെന്ന് മന്ത്രി ബിന്ദു കൃഷ്ണ.
കൊല്ലത്ത്നിന്ന് വേളാങ്കണ്ണിയിലേക്കുള്ള കെഎസ്ആര്‍ടിസി സൂപ്പര്‍ ഫാസ്റ്റ് ബസ് സര്‍വീസ് കൊല്ലം ഡിപ്പോയില്‍ ഫ്ലാഗ് ഓഫ് ചെയ്ത് പ്രസംഗിക്കുകയായിരുന്നു മന്ത്രി. എംഎല്‍എയുടെ ആസ്തി വികസന ഫണ്ട് ഉപയോഗപ്പെടുത്തി കൊല്ലം ഡിപ്പോയിലേക്ക് ബസ് വാങ്ങി നല്‍കാനുള്ള നടപടികള്‍ പുരോഗമിക്കുകയാണെന്നും മന്ത്രി പറഞ്ഞു.
കൂടുതല്‍ സര്‍വീസുകള്‍ ആരംഭിക്കുക വഴി കൊല്ലം ഡിപ്പോയുടെ പ്രതാപകാലം വീണ്ടെടുക്കാനാണ് ശ്രമമെന്നും മന്ത്രി കൂട്ടിച്ചേര്‍ത്തു.
കോര്‍പറേഷന്‍ വികസനകാര്യ സ്റ്റാന്‍ഡിംഗ് കമ്മിറ്റി ചെയര്‍മാന്‍ കുരുവിള ജോസഫ് അധ്യക്ഷനായ ഉദ്ഘാടന ചടങ്ങില്‍ കെഎസ്ആര്‍ടിസി അസിസ്റ്റന്‍റ് ട്രാന്‍സ്‌പോര്‍ട്ട് ഓഫി സര്‍ അജിത് കുമാര്‍ ബി, ഡിപ്പോ എന്‍ജിനിയര്‍ വി.വി. ഷാജു, ട്രാന്‍സ്‌പോര്‍ട്ട് മാനേജ്‌മെന്‍റ് കമ്മിറ്റി അംഗങ്ങള്‍, കൊല്ലം ബിഷപ് പോള്‍ ആന്‍റണി മുല്ലശേരി, കൊല്ലം രൂപത പ്രൊക്യുറേറ്റര് ഫാ.ജോളി ഏബ്രഹാം, വിവിധ രാഷ്്‌ട്രീയ പാര്‍ട്ടി പ്രതിനിധികള്‍, ജീവനക്കാര്‍, യാത്രക്കാര്‍ തുടങ്ങിയവര്‍ പങ്കെടുത്തു.
വെള്ളി, ശനി ദിവസങ്ങളില്‍ ഉച്ചയ്ക്ക് 2.15ന് കൊല്ലത്ത് നിന്ന് പുറപ്പെടുന്ന സൂപ്പര്‍ ഫാസ്റ്റ് ബസ് പിറ്റേന്ന് രാവിലെ 6.05ന് വേളാങ്കണ്ണിയിലെത്തും. വേളാങ്കണ്ണിയില്‍നിന്ന് ശനി, ഞായര്‍ ദിവസങ്ങളില്‍ വൈകുന്നേരം മൂന്നിന് പുറപ്പെടുന്ന ബസ് പിറ്റേന്ന് രാവിലെ ഏഴിന് കൊല്ലത്തെത്തും. കൊല്ലത്ത് നിന്ന് വേളാങ്കണ്ണിയിലേക്ക് 616 രൂപയാണ് നിരക്ക്. ഓണ്‍ലൈന്‍ ബുക്കിങ്ങില്‍ 10 രൂപ സര്‍വീസ് ചാര്‍ജ് കൂടി ഈടാക്കും. തിരുവനന്തപുരം, കളിയക്കാവിള, നാഗര്‍കോവില്‍, തിരുനെല്‍വേലി, മധുര, തിരുച്ചിറപ്പള്ളി, തഞ്ചാവൂര്‍ റൂട്ടിലാണ് ബസ് സര്‍വീസ് നടത്തുന്നത്. നാഗപട്ടണത്ത് സ്റ്റോപ്പുള്ളതിനാല്‍ നാഗൂര്‍ ദര്‍ഗയിലേക്ക് പോകുന്നവര്‍ക്കും ബസ് സര്‍വീസ് സഹായകമാകും.
Deepika
Corehub Solutions
E-paper LOGIN
LOGIN
