കൊച്ചി: ജഡ്ജിമാര്ക്കെതിരേ അപകീര്ത്തി പ്രസ്താവന നടത്തിയതുമായി ബന്ധപ്പെട്ട് കെ. സുധാകരന് എംപിക്കെതിരേ സ്വീകരിച്ച കോടതിയലക്ഷ്യ നടപടികള് ഹൈക്കോടതി തീര്പ്പാക്കി.
മട്ടന്നൂര് ഷുഹൈബ് വധക്കേസിലെ കോടതി ഉത്തരവുമായി ബന്ധപ്പെട്ടു നടത്തിയ പരാമര്ശത്തെത്തുടര്ന്ന് സ്വീകരിച്ച നടപടിയുടെ ഭാഗമായി സുധാകരന് കോടതിയില് നേരിട്ടെത്തി മാപ്പപേക്ഷിച്ച സാഹചര്യത്തിലാണു ജസ്റ്റീസുമാരായ വി. രാജ വിജയരാഘവന്, കെ.വി. ജയകുമാര് എന്നിവരടങ്ങുന്ന ഡിവിഷന് ബെഞ്ച് നടപടികള് അവസാനിപ്പിച്ചത്.
ഷുഹൈബ് വധക്കേസില് സിബിഐ അന്വേഷണത്തിനുള്ള സിംഗിള് ബെഞ്ച് ഉത്തരവ് റദ്ദാക്കിയ ഹൈക്കോടതി ഡിവിഷന് ബെഞ്ചിലെ ജഡ്ജിമാരെ അവഹേളിക്കുന്ന പ്രസ്താവന സുധാകരന് നടത്തിയെന്നാരോപിച്ച് അഡ്വ. കെ. ജനാര്ദന ഷേണായി നല്കിയ കോടതിയലക്ഷ്യ ഹര്ജിയിലായിരുന്നു സുധാകരനെതിരേ നടപടി സ്വീകരിച്ചത്.
നേരത്തേ സത്യവാങ്മൂലം വഴി മാപ്പപേക്ഷിച്ചിരുന്നെങ്കിലും നേരിട്ടു ഹാജരാകാന് കോടതി നിര്ദേശിച്ചിരുന്നു.
E-paper LOGIN
LOGIN