ഡൽഹിയിലെ കർക്കർദൂമ മെട്രോ സ്റ്റേഷനിലെത്തിയ യാത്രക്കാർക്ക് കൗതുകകരവുമായ ഒരു കാഴ്ചയാണ് കഴിഞ്ഞ ദിവസം കാണാനായത്. തിരക്കേറിയ സ്റ്റേഷൻ കവാടത്തിലെ പടിക്കെട്ടുകൾക്ക് തൊട്ടരികിലായി ഒരു പശു നിലയുറപ്പിച്ചതാണ് യാത്രക്കാരുടെ ശ്രദ്ധയാകർഷിച്ചത്. പടിക്കെട്ടുകളിലൂടെ ആളുകൾ പതിവുപോലെ കയറിയിറങ്ങുന്നതിനിടെ ശാന്തമായി നിൽക്കുന്ന പശുവിന്റെ ചിത്രം പ്രതീക് സൈനി എന്ന എക്സ് ഉപയോക്താവാണ് പുറത്തുവിട്ടത്. കർക്കർദൂമ മെട്രോ സ്റ്റേഷന് ചുറ്റും നടക്കുന്ന കാര്യങ്ങൾ എന്ന അടിക്കുറിപ്പോടെ ഡൽഹി മെട്രോ റെയിൽ കോർപ്പറേഷനെ ടാഗ് ചെയ്തുകൊണ്ടാണ് അദ്ദേഹം ഈ ദൃശ്യം പങ്കുവെച്ചത്.
ചിത്രം സമൂഹമാധ്യമങ്ങളിൽ പ്രചരിച്ചതോടെ സമ്മിശ്ര പ്രതികരണങ്ങളാണ് ഉയർന്നത്. ചിലർ ഈ ദൃശ്യത്തെ കൗതുകത്തോടെ കണ്ടപ്പോൾ, സുരക്ഷാ സജീകരണങ്ങളുള്ള പൊതുഗതാഗത കേന്ദ്രത്തിലേക്ക് മൃഗങ്ങൾ എങ്ങനെയാണ് എത്തുന്നതെന്ന ആശങ്കയും പലരും പങ്കുവെച്ചു. സംഭവം ശ്രദ്ധയിൽപ്പെട്ടതോടെ ഡൽഹി മെട്രോ അധികൃതർ ഔദ്യോഗിക വിശദീകരണവുമായി രംഗത്തെത്തി. യാത്രക്കാർക്കുണ്ടായ ബുദ്ധിമുട്ടിൽ ഖേദം പ്രകടിപ്പിച്ച അധികൃതർ, സ്റ്റേഷൻ പരിസരത്ത് നിന്ന് മൃഗങ്ങളെ ഒഴിവാക്കാൻ ജീവനക്കാർക്ക് കൃത്യമായ നിർദ്ദേശം നൽകിയിട്ടുണ്ടെന്ന് അറിയിച്ചു. വിഷയം ബന്ധപ്പെട്ട തദ്ദേശ സ്ഥാപനങ്ങളുടെ ശ്രദ്ധയിൽപ്പെടുത്തുമെന്നും, യാത്രക്കാർക്ക് പരാതികളും നിർദ്ദേശങ്ങളും അറിയിക്കുന്നതിനായി ഔദ്യോഗിക ഫീഡ്ബാക്ക് പോർട്ടൽ ഉപയോഗിക്കാമെന്നും ഡിഎംആർസി വ്യക്തമാക്കി. പൊതുഗതാഗത ഇടങ്ങൾ തടസരഹിതമായി സൂക്ഷിക്കേണ്ടതിന്റെ പ്രാധാന്യമാണ് ഈ സംഭവം വീണ്ടും ഓർമ്മിപ്പിക്കുന്നത്.