എടത്വ: ചക്കുളത്തുകാവ് ഭഗവതി ക്ഷേത്രത്തിലെ കാർത്തിക പൊങ്കാല മഹോത്സവത്തിന് മുന്നോടിയായി ക്ഷേത്ര സന്നിധിയിൽ കാർത്തിക സ്തംഭം ഉയർന്നു. നെടുമ്പ്രം തച്ചാറയിൽ ആശാലതയുടെ വസതിയിൽനിന്നാണ് കാർത്തിക സ്തംഭത്തിനുള്ള കമുക് വഴിപാടായി സമർപ്പിച്ചത്. ചെണ്ടമേളങ്ങളുടെ അകമ്പടിയോടുകൂടിയാണ് കമുകിൻതടി ക്ഷേത്രത്തിൽ എത്തിച്ചത്. കമുകിൻതടിയിൽ വാഴക്കച്ചി. തെങ്ങോല, ദേവിക്ക് ഒരുവർഷം കിട്ടിയ ഉടയാട എന്നിവ പൊതിഞ്ഞ് കെട്ടിയാണ് കാർത്തികസ്തംഭം ഉണ്ടാക്കിയത്.
പൊങ്കാല ദിവസം ദീപാരാധയോടനുബന്ധിച്ച് കാർത്തികസ്തംഭം അഗ്നിക്ക് ഇരയാക്കും. കാര്യദർശി മണിക്കുട്ടൻ നമ്പൂതിരിയുടെ അധ്യക്ഷതയിൽ നടന്ന സ്തംഭം ഉയർത്തൽ ചടങ്ങിൽ രാധാക്യഷ്ണൻ നമ്പൂതിരി അനുഗ്രഹ പ്രഭാഷണം നിർവഹിച്ചു. ചമ്പക്കുളം ബ്ലോക്ക് പഞ്ചായത്ത് പ്രസിഡന്റ് ടിജിൻ ജോസഫ് ഉദ്ഘാടനം ചെയ്തു. തലവടി പഞ്ചായത്തംഗങ്ങളായ ഗോകുൽ ഗോപാലകൃഷ്ണൻ, പ്രകാശ് പനവേലി, എം.ജി കൊച്ചുമോൻ, ബി. രമേഷ് കുമാർ, ജനറൽ കൺവീനർ അജിത്ത് പിഷാരത്ത്, ഉത്സവ കമ്മറ്റി പ്രസിഡന്റ് സന്തോഷ് ഗോകുലം, വൈസ് പ്രസിഡന്റ് പി.കെ. സ്വാമിനാഥൻ, സെക്രട്ടറി എം.വി. രാജീവ്, വോളന്റിയർ ക്യാപ്റ്റൻ കെ.എസ്. ബിനു എന്നിവർ പ്രസംഗിച്ചു.
മേൽശാന്തിമാരായ അശോകൻ നമ്പൂതിരി, രഞ്ജിത്ത് ബി. നമ്പൂതിരി, ദുർഗാദത്തൻ നമ്പൂതിരി എന്നിവർ കാർമികത്വം വഹിച്ചു. പൊങ്കാല ദിനത്തിലെ ദീപാരാധനയ്ക്കു ശേഷം ദേവിയെ ക്ഷേത്രത്തിൽനിന്ന് പുറത്തേക്ക് എഴുന്നള്ളിച്ച് ക്ഷേത്രത്തിനു പുറത്തെ മണ്ഡപത്തിൽ പ്രത്യേകം തയാറാക്കിയ പീഠത്തിൽ കിഴക്കോട്ട് അഭിമുഖമായി ഇരുത്തിയ ശേഷമാണ് കാർത്തികസ്തംഭം കത്തിക്കൽ ചടങ്ങ് നടത്തുന്നത്.
ഇക്കുറി പഞ്ചിമബംഗാൾ മുൻ ഗവർണർ സി.വി. ആനന്ദബോസ് സ്തംഭത്തിൽ അഗ്നി പകർത്തും. സംസ്ഥാനത്തിനകത്തും പുറത്തുനിന്നു നിരവധി ഭക്തരാണ് ചടങ്ങ് ദർശിക്കാൻ ക്ഷേത്രത്തിൽ എത്തിച്ചേരുന്നത്.
പൊങ്കാലയുടെ വരവ് അറിയിച്ച് നടത്തുന്ന നിലവറ ദീപം തെളിക്കലും വിളംബര ഘോഷയാത്രയും 20 ന് നടക്കുമെന്ന് ക്ഷേത്ര കാര്യദർശി മണിക്കുട്ടൻ നമ്പൂതിരി അറിയിച്ചു.