19

മലയാളികളുടെ പ്രിയതാരം മഞ്ജു വാര്യർക്ക് നേരെ ആരാധകരുടെ ഭാഗത്തുനിന്നുണ്ടായ അതിരുവിട്ട സ്നേഹപ്രകടനം ഇപ്പോൾ സോഷ്യൽ മീഡിയയിൽ വലിയ ചർച്ചകൾക്ക് വഴിവെച്ചിരിക്കുകയാണ്.

മാർച്ച് 15-ന് പാലക്കാട് ഒരു ജുവലറി ഉദ്ഘാടന വേദിയിൽ വെച്ച് നടന്ന സംഭവത്തിന്‍റെ ദൃശ്യങ്ങൾ പുറത്തുവന്നതോടെയാണ് താരങ്ങളുടെ സുരക്ഷയെ സംബന്ധിച്ച ആശങ്കകൾ വീണ്ടും ഉയരുന്നത്.

പൊതുവേദിയിൽ ആരാധകരുമായി സംസാരിച്ചു കൊണ്ടിരുന്ന മഞ്ജുവിനരികിലേക്ക് ആൾക്കൂട്ടത്തിനിടയിൽ നിന്ന് പെട്ടെന്ന് ഒരാരാധിക ഓടിക്കയറുകയും താരത്തെ കടന്നുപിടിച്ച് ബലമായി ചുംബിക്കാൻ ശ്രമിക്കുകയുമായിരുന്നു.

അപ്രതീക്ഷിതമായുണ്ടായ ഈ നീക്കത്തിൽ അവതാരകയായ മീര അനിലും മറ്റ് സംഘാടകരും ചേർന്ന് യുവതിയെ പിന്തിരിപ്പിക്കാൻ ശ്രമിച്ചെങ്കിലും അവർ മഞ്ജുവിനെ വിടാൻ തയ്യാറായില്ല. ഒടുവിൽ ബൗൺസർമാർ ഇടപെട്ടാണ് ഇവരെ വേദിയിൽ നിന്നും മാറ്റിയത്.

എന്നാൽ തന്‍റെ പ്രവർത്തിയിൽ യാതൊരു ഖേദവുമില്ലാതെ, മഞ്ജുവിനോടുള്ള ഇഷ്ടം കൊണ്ടാണ് താൻ ഇങ്ങനെ ചെയ്തതെന്നായിരുന്നു യുവതിയുടെ പ്രതികരണം. ഇത്രയേറെ പരിഭ്രാന്തിയുണ്ടാക്കിയ സാഹചര്യത്തിലും അതീവ സംയമനത്തോടെയും ചിരിയോടെയും ആ നിമിഷത്തെ മഞ്ജു വാര്യർ നേരിട്ടത് ആരാധകരുടെ പ്രശംസ പിടിച്ചുപറ്റിയിട്ടുണ്ട്.

തന്നെ കാണാൻ എത്തിയവരെ നിരാശരാക്കാതെ തുടർന്നും അവർ പരിപാടിയിൽ സഹകരിക്കുകയും ഫോട്ടോകൾക്ക് പോസ് ചെയ്യുകയും ചെയ്തു. എങ്കിലും, ഈ സംഭവത്തെ രൂക്ഷമായ ഭാഷയിലാണ് സമൂഹമാധ്യമങ്ങൾ വിമർശിക്കുന്നത്.

സ്നേഹത്തിന്‍റെ പേരിലായാൽ പോലും ഒരാളുടെ സ്വകാര്യതയിലേക്ക് അനുവാദമില്ലാതെ കടന്നുകയറുന്നത് അംഗീകരിക്കാനാവില്ലെന്നും, താരങ്ങൾക്കും സാധാരണക്കാരെപ്പോലെ മാന്യമായി പൊതുവിടങ്ങളിൽ ഇടപെടാൻ അവകാശമുണ്ടെന്നും പലരും ചൂണ്ടിക്കാട്ടുന്നു.

ഇത്തരം ചടങ്ങുകളിൽ സംഘാടകർ കൂടുതൽ സുരക്ഷാ മുൻകരുതലുകൾ എടുക്കണമെന്നും സെലിബ്രിറ്റികൾക്ക് നേരെയുള്ള ഇത്തരം അതിക്രമങ്ങൾക്കെതിരെ കർശന നടപടി വേണമെന്നുമുള്ള ആവശ്യവും ശക്തമാവുകയാണ്.