തിരുവനന്തപുരം: സംസ്ഥാനത്ത് ബാറുകൾക്ക് ലൈസൻസ് ലഭിക്കാൻ നേരത്തേയുണ്ടായിരുന്നതുപോലെ തദ്ദേശസ്ഥാപന ലൈസൻസും നിർബന്ധമാക്കുന്നതും സർക്കാർ പരിഗണനയിൽ. നേരത്തേ ബാർ ലൈസൻസ് ലഭിക്കാൻ തദ്ദേശസ്ഥാപനങ്ങളുടെ അനുമതിപത്രം നിർബന്ധമാക്കിയിരുന്നു. എന്നാൽ, ഒന്നാം പിണറായി സർക്കാരിന്റെ കാലത്ത് തദ്ദേശ സ്ഥാപനങ്ങളുടെ അധികാരം എടുത്തുകളയുകയായിരുന്നു.
തദ്ദേശസ്ഥാപന ലൈസൻസ് പുനഃസ്ഥാപിക്കണമെന്ന് വിവിധ മദ്യവിരുദ്ധ സംഘടനകളും മുതിർന്ന കോണ്ഗ്രസ് നേതാവ് വി.എം. സുധീരനും മുഖ്യമന്ത്രി വി.ഡി. സതീശനോടും എക്സൈസ് മന്ത്രി എം. ലിജുവിനോടും അഭ്യർഥിച്ചിരുന്നു. ഇക്കാര്യം യുഡിഎഫ് സർക്കാരിന്റെ മദ്യനയത്തിൽ പ്രധാനമായി പരിഗണിക്കുന്നുണ്ടെന്നാണു വിവരം. ബാറുകളുടെ പ്രവർത്തനസമയം നേരത്തേയുണ്ടായിരുന്നതുപോലെ പുനഃക്രമീകരിക്കുന്നതും സർക്കാർ പരിഗണനയിലുണ്ട്. നേരത്തേ രാവിലെ 11 മുതൽ രാത്രി 11 വരെയായിരുന്നു പ്രവർത്തനസമയം.
എന്നാൽ, രണ്ടാം പിണറായി സർക്കാരിന്റെ കാലത്ത് വി.എൻ. വാസവൻ എക്സൈസ് മന്ത്രിയായിരിക്കേ ബാറുകളുടെ പ്രവർത്തനസമയം അർധരാത്രി 12 വരെ നീട്ടുകയായിരുന്നു. ടൂറിസം മേഖലയിലെ ഹോട്ടലുകളിലും ഫൈവ് സ്റ്റാർ ഹോട്ടലുകളിലും ഇതു പുലർച്ചെ മൂന്നുവരെയാക്കിയിരുന്നു. മദ്യത്തിന്റെ ഉപഭോഗം കുറയ്ക്കാനും അക്രമപ്രവർത്തനങ്ങൾ അവസാനിപ്പിക്കാനുമായി സമയം രാത്രി 10 വരെയാക്കി കുറയ്ക്കണമെന്നാണ് മദ്യവിരുദ്ധ പ്രവർത്തകരടക്കം മദ്യനയ ചർച്ചയിൽ മന്ത്രിയോട് ആവശ്യപ്പെട്ടിട്ടുള്ളത്. വീര്യം കുറഞ്ഞ മദ്യത്തിന്റെ വിൽപന അനുവദിക്കരുതെന്നും ആവശ്യമുയർന്നു.
ഇന്നലെ മന്ത്രിയുടെ അധ്യക്ഷതയിൽ തൈക്കാട് ഗസ്റ്റ്ഹൗസിൽ നടന്ന മദ്യനയ ചർച്ചയിൽ വിവിധ മദ്യവിരുദ്ധ പ്രസ്ഥാനങ്ങളെയും സാമൂഹിക-സാംസ്കാരിക സംഘടനകളെയും പ്രതിനിധീകരിച്ച് ഇയ്യാംചേരി കുഞ്ഞുകൃഷ്ണൻ, ഫാ. ജോണ് അരീക്കൽ, ജോണ്സണ് ഇടയാറന്മുള, ഇ.എ. ജോസഫ്, സി.സി. സാജൻ, ബിന്ദു ജി. മേനോൻ, പ്രഫ. രവീന്ദ്രൻ, മഹാദേവ കൈമൾ പാലാ തുടങ്ങിയവർ പങ്കെടുത്തു. മദ്യനയ ചർച്ചകൾ ഒക്ടോബർ ഒന്നിന് അവസാനിപ്പിക്കും. തുടർന്ന് യുഡിഎഫ് യോഗം ചേർന്ന് മദ്യനയത്തിന്റെ കരടിനു രൂപം നൽകും. പിന്നീട് മന്ത്രിസഭയിൽ കൊണ്ടുവന്നു പാസാക്കും.
Deepika
E-paper LOGIN
LOGIN
