കൊല്ലം: മണ്ഡലകാലം മുൻനിർത്തി എംസി റോഡിൽ സുരക്ഷാ ക്രമീകരണങ്ങൾ ഉറപ്പാക്കണമെന്ന ആവശ്യം ശക്തമാകുന്നു. പലയിടത്തും റോഡരികിൽ ഒരാൾ പൊക്കത്തിലധികം വലുപ്പത്തിൽ പുല്ലുകയറിക്കിടക്കുന്നു.
വളവുകളിൽ എതിർഭാഗത്തുനിന്നു വരുന്ന വാഹനങ്ങൾ കാണാൻ സാധിക്കാത്ത അവസ്ഥയാണ് നിലവിലുള്ളത്. ചില ഭാഗങ്ങളിലാകട്ടെ നടപ്പാതയും കാടുമൂടി പൂർണമായും മറഞ്ഞുകഴിഞ്ഞു. വാഹനങ്ങളിടിച്ചും മറ്റും തകർന്നുകിടക്കുന്ന സുരക്ഷാവേലികളും ധാരാളമായി കാണാനാവും.
പൂവറ്റൂർക്കിഴക്ക് സിഎസ്ഐ പള്ളിക്ക് സമീപം മണ്ണൊലിച്ചു റോഡിലേക്കിറങ്ങിക്കിടക്കുന്നു. ഇവിടെ ഇരുചക്രവാഹനങ്ങൾ ദിനവും തെന്നിമറിയുകയാണ്.
തെരുവുവിളക്കുകളാകട്ടെ ഭൂരിഭാഗവും പ്രകാശിക്കുന്നില്ലെന്നത് അപകടസാധ്യത വർധിപ്പിക്കുന്നു. ഓടകളുടെ മൂടി പലയിടത്തും തകർന്നുകിടക്കുകയാണ്.
കുളക്കട എം.എൻ. നഗറിന് സമീപം ഓടയുടെ മൂടി നെടുകെ പിളർന്നുകിടന്നിട്ട് നാളേറെയായി. സിഎസ്ഐ പള്ളിക്കു സമീപം കഴിഞ്ഞദിവസം ഒരു കാറിടിച്ച് വൈദ്യുതത്തൂൺ തകർന്നിരുന്നു.
ശബരിമലയിലേക്കുള്ള തീർഥാടകർ ഏറ്റവും കൂടുതൽ ആശ്രയിക്കുന്നത് എംസി റോഡിനെയാണ്. സ്ഥിരം അപകടങ്ങൾ നടക്കുന്ന ബ്ലാക്ക് സ്പോട്ടുകളായി കണ്ടെത്തിയിരിക്കുന്ന ഭാഗത്തുപോലും വേണ്ട സുരക്ഷയൊരുക്കാൻ കെഎസ്ടിപി തയാറാകാത്തതിന് വലിയ വിലനൽകേണ്ടിവരുമെന്ന് ഐഎൻടിയുസി കുറ്റപ്പെടുത്തി.