മൂവാറ്റുപുഴ: നഗരത്തിലെയും പരിസരപ്രദേശങ്ങളിലെയും രൂക്ഷമായ ഗതാഗതക്കുരുക്കും യാത്രാക്ലേശവും പരിഹരിക്കുന്നതിനായി ചേർന്ന ഗതാഗത കമ്മിറ്റി യോഗത്തിൽ നിലപാട് കടുപ്പിച്ച് മാത്യു കുഴൽനാടൻ എംഎൽഎ.
നഗരത്തിലെ റോഡരികുകളിലെ അനധികൃത പാർക്കിംഗ് കർശനമായി തടയാനും ബസ് ബേ നിയമങ്ങൾ കൃത്യമായി പാലിക്കാനും അദ്ദേഹം ഉദ്യോഗസ്ഥരോട് ആവശ്യപ്പെട്ടു. യോഗത്തിൽ തീരുമാനിച്ച ഗതാഗത പരിഷ്കാരങ്ങൾ ആദ്യഘട്ടമായി ഒരു മാസത്തേക്ക് പ്രാവർത്തികമാക്കാനും, പ്രവർത്തനം വിലയിരുത്തിയ ശേഷം ആവശ്യമായ മാറ്റങ്ങൾ വരുത്താനും അദ്ദേഹം നിർദേശം നൽകി.
നഗരത്തിലെ റോഡ് വശങ്ങളിൽ വാഹനങ്ങൾ പാർക്ക് ചെയ്യരുതെന്നും ബന്ധപ്പെട്ട ഉദ്യോഗസ്ഥർ ഈ വിഷയം ഗൗരവമായി എടുക്കുന്നില്ലെന്നും എംഎൽഎ യോഗത്തിൽ ചൂണ്ടിക്കാട്ടി.
ബസ് ബേ കൃത്യമായി പാലിക്കപ്പെടുന്നുണ്ടെന്ന് ഉറപ്പുവരുത്തണം. അനധികൃതമായി ബസ് സ്റ്റോപ്പുകളിൽ നിന്നും മാറ്റി നിർത്തുന്ന ബസുകൾക്കെതിരെ കർശന നടപടി സ്വീകരിക്കും. ഗതാഗത നിയമങ്ങൾ പാലിക്കാത്തവർക്കെതിരെ പിഴ ഈടാക്കണമെന്നും അദ്ദേഹം ആവശ്യപ്പെട്ടു.