18

ന്യൂഡൽഹി: മുഖ്യ തെരഞ്ഞെടുപ്പ് കമ്മിഷണർ ഗ്യാനേഷ് കുമാറിനെതിരെ കേസെടുക്കണമെന്നാവശ്യപ്പെട്ട് തൃണമൂൽ കോൺഗ്രസ് എംപി മഹുവ മൊയ്ത്ര ഡൽഹി പാർലമെന്‍റ് സ്ട്രീറ്റ് പൊലിസ് സ്റ്റേഷനിൽ പരാതി നൽകി.

തീവ്ര വോട്ടർ പട്ടിക പരിഷ്കരണവുമായി ബന്ധപ്പെട്ട തെരഞ്ഞെടുപ്പ് കമ്മിഷന്‍റെ തീരുമാനങ്ങളിൽ മറ്റ് രണ്ട് തെരഞ്ഞെടുപ്പ് കമ്മിഷണർമാർ വിയോജിപ്പ് രേഖപ്പെടുത്തിയെന്ന റിപ്പോർട്ടുകളെ തുടർന്നാണ് നീക്കം. എന്നാൽ എംപിയുടെ പരാതിയിൽ പൊലിസ് ഇതുവരെ എഫ്ഐആർ രജിസ്റ്റർ ചെയ്തിട്ടില്ല.

കമ്മിഷണർമാരായ സുഖ്ബീർ സിംഗ് സന്ധു, വിവേക് ജോഷി എന്നിവർ കഴിഞ്ഞ പത്ത് മാസത്തിനിടെ 14 തവണ കമ്മിഷന്‍റെ തീരുമാനങ്ങളോടും ഉത്തരവുകളോടും വിയോജിപ്പ് പ്രകടിപ്പിച്ചതായി മഹുവ പരാതിയിൽ ചൂണ്ടിക്കാട്ടുന്നു.

വോട്ടർമാരെ ചേർക്കൽ, ഒഴിവാക്കൽ, പുനഃസ്ഥാപിക്കൽ തുടങ്ങിയ വോട്ടർ രജിസ്ട്രേഷൻ നടപടികളിലെ മാറ്റങ്ങൾ ഇതിൽ ഉൾപ്പെടുന്നു. മറ്റ് അംഗങ്ങളുടെ രേഖാമൂലമുള്ള വിയോജിപ്പുകളെ അവഗണിച്ച് ഏകപക്ഷീയമായി തീരുമാനമെടുക്കാൻ മുഖ്യ തെരഞ്ഞെടുപ്പ് കമ്മിഷണർക്ക് അധികാരമില്ലെന്നാണ് മഹുവ മൊയ്ത്രയുടെ പ്രധാന വാദം.

കമ്മിഷന്‍റെ കൂട്ടായ അംഗീകാരമില്ലാത്ത ആശയവിനിമയങ്ങൾ പുറപ്പെടുവിക്കാൻ മുഖ്യ തെരഞ്ഞെടുപ്പ് കമ്മിഷണർക്ക് അവകാശമില്ലെന്നും പരാതിയിൽ വ്യക്തമാക്കുന്നു.