ന്യൂഡൽഹി: കേരള ഹൗസിൽ വി.ഡി. സതീശനെ അനുമതിയില്ലാതെ കാണാൻ ശ്രമിച്ച രണ്ട് ജീവനക്കാർക്കെതിരെയുള്ള നടപടി നീക്കം മുഖ്യമന്ത്രി തടഞ്ഞു. തുടർനടപടികൾ സ്വീകരിക്കരുതെന്ന് റെസിഡന്റ് കമ്മീഷണർക്ക് അദ്ദേഹം നിർദേശം നൽകി. ഡൽഹിയിൽ കഴിഞ്ഞ ദിവസം എത്തിയ മുഖ്യമന്ത്രിയെ കാണാനെത്തിയ രണ്ട് ജീവനക്കാരെ ചൊല്ലിയാണ് കേരള ഹൗസിൽ പുതിയ വിവാദം ഉടലെടുത്തത്.
ജീവനക്കാരായ സിബി ജോസും പി.സി.സുരേഷ് കുമാറുമാണ് മുറിയിലെത്തി മുഖ്യമന്ത്രിയെ കണ്ടത്. എന്നാൽ നിലവിലുള്ള നിർദേശങ്ങൾക്ക് വിരുദ്ധമായാണ് ജീവനക്കാർ മുഖ്യമന്ത്രിയെ കാണാനെത്തിയതെന്ന് ചൂണ്ടിക്കാട്ടി റെസിഡന്റ് കമ്മീഷണർ പുനീത് കുമാറിന്റെ നിർദേശപ്രകാരം കേരള ഹൗസ് കൺട്രോളർ ഇരുവർക്കും മെമ്മോ നൽകി. വിശദീകരണവും തേടിയിരുന്നു.
മുഖ്യമന്ത്രി കേരള ഹൗസിലെത്തുമ്പോൾ സുരക്ഷയുടെയും തിരക്ക് നിയന്ത്രണത്തിന്റെയും ഭാഗമായി മുറിക്ക് മുന്നിൽ അനാവശ്യമായി ആളുകൾ കൂട്ടംകൂടരുതെന്ന് നേരത്തേ നിർദേശം നൽകിയിരുന്നതായാണ് അധികൃതരുടെ വിശദീകരണം. കാരണം കാണിക്കൽ നോട്ടീസിന് ജീവനക്കാർ ഇന്നലെ മറുപടിയും നൽകിയിരുന്നു. എന്നാൽ സംഭവം വാർത്തയായതോടെ മുഖ്യമന്ത്രി വിഷയത്തിൽ ഇടപെടുകയായിരുന്നു.
ജീവനക്കാർക്കെതിരെ തുടർനടപടികളൊന്നും സ്വീകരിക്കേണ്ടതില്ലെന്ന് റെസിഡന്റ് കമ്മീഷണർക്ക് നിർദേശം നൽകി. അതേസമയം റെസിഡന്റ് കമ്മീഷണറുടെ നടപടിയിൽ കേരള ഹൗസിലെ ജീവനക്കാർക്കിടയിൽ കടുത്ത അതൃപ്തിയുണ്ട്. പുനീത് കുമാർ ജീവനക്കാർക്കെതിരെ ഏകപക്ഷീയമായ നടപടികൾ സ്വീകരിക്കുന്നുവെന്ന പരാതിയും ഒരു വിഭാഗം ജീവനക്കാർ നേരത്തേ ഉന്നയിച്ചിരുന്നു.