20

ഫ്രഞ്ച് പ്രസിഡന്‍റ് ഇമ്മാനുവൽ മാക്രോണും ഇറ്റാലിയൻ പ്രധാനമന്ത്രി ജോർജിയ മെലോണിയും പാരീസിൽ നടത്തിയ കൂടിക്കാഴ്ചക്കിടെ ഉണ്ടായ ഒരു സംഭവം സമൂഹമാധ്യമങ്ങളിൽ വൻ ചർച്ചകൾക്ക് വഴിതുറന്നിരിക്കുകയാണ്. ഇറാൻ, ഹോർമുസ് കടലിടുക്ക് എന്നീ വിഷയങ്ങളിൽ നിർണായക ചർച്ചകൾക്കായി ഒത്തുചേർന്നതായിരുന്നു ഇരുവരും.

എന്നാൽ, കൂടിക്കാഴ്ചയുടെ തുടക്കത്തിൽ മാക്രോൺ മെലോണിയെ കെട്ടിപ്പിടിച്ച രീതി വളരെ വിചിത്രമായി തോന്നിയത് കാഴ്ചക്കാരിൽ വലിയ അമ്പരപ്പാണ് ഉണ്ടാക്കിയത്.

ഈ ദൃശ്യങ്ങൾ വളരെ വേഗത്തിൽ ഇന്‍റർനെറ്റിൽ വൈറലായി മാറി. ഇരുവരുടെയും ശരീരഭാഷയെക്കുറിച്ച് പലതരത്തിലുള്ള വ്യാഖ്യാനങ്ങളാണ് ഉയരുന്നത്.

എന്നാൽ, ഇത് കേവലം ഒരു തമാശയെത്തുടർന്നുണ്ടായ പ്രതികരണം മാത്രമാണെന്നും, മെലോണിയെ കണ്ടതിലുള്ള സന്തോഷം പ്രകടിപ്പിക്കാൻ മാക്രോൺ കാണിച്ച ഒരു രീതി മാത്രമാണിതെന്നുമാണ് വലിയൊരു വിഭാഗം ആളുകൾ അഭിപ്രായപ്പെടുന്നത്.

ഈ സംഭവത്തിന് തൊട്ടുപിന്നാലെയാണ് ആഗോള രാഷ്ട്രീയത്തിൽ വലിയ പ്രാധാന്യമുള്ള മറ്റൊരു പ്രഖ്യാപനം ഇറാനിൽ നിന്ന് ഉണ്ടായത്. ലെബനനിലെ വെടിനിർത്തൽ നടപടികളോട് സഹകരിച്ചുകൊണ്ട്, ഹോർമുസ് കടലിടുക്കിലൂടെയുള്ള വാണിജ്യ കപ്പലുകളുടെ ഗതാഗതം പൂർണമായും പുനരാരംഭിച്ചതായി ഇറാൻ വിദേശകാര്യമന്ത്രി സെയ്ദ് അബ്ബാസ് അരാഗ്ചി അറിയിച്ചു.

ഏപ്രിൽ 16-ന് വൈകുന്നേരം അഞ്ച് മണി മുതൽ ഇസ്രായേലും ലെബനനും തമ്മിലുള്ള ശത്രുത അവസാനിപ്പിക്കാൻ അമേരിക്ക മുൻകൈ എടുത്തിരുന്നു. ഇതിന്‍റെ തുടർച്ചയായാണ് ഇറാൻ ഇത്തരമൊരു തീരുമാനം കൈക്കൊണ്ടത്.

ഈ നീക്കത്തെ അതീവ താൽപ്പര്യത്തോടെയാണ് അന്താരാഷ്ട്ര സമൂഹം നോക്കിക്കാണുന്നത്. യുഎസ് പ്രസിഡന്‍റ് ഡൊണാൾഡ് ട്രംപ് ഈ വിഷയത്തിൽ തന്‍റെ പ്രതികരണം ട്രൂത്ത് സോഷ്യലിലൂടെ രേഖപ്പെടുത്തി. ഹോർമുസ് കടലിടുക്ക് ഗതാഗതത്തിനായി തുറന്നുനൽകിയ ഇറാൻ ഭരണകൂടത്തിന് അദ്ദേഹം നന്ദി അറിയിക്കുക കൂടി ചെയ്തു.