കോട്ടയം: ഗുജറാത്തിലെ രാജ്‌കോട്ട് രൂപതയുടെ വളര്‍ച്ചയ്ക്കും പ്രേഷിതപ്രവര്‍ത്തനങ്ങള്‍ക്കും വിലയേറിയ സംഭാവനകള്‍ നല്കിയ വ്യക്തിയാണ് കഴിഞ്ഞ ദിവസം അന്തരിച്ച ഫാ. മാത്യു കളത്തൂര്‍ സിഎംഐ.
1936 ജൂണ്‍ 13ന് കോട്ടയം ജില്ലയിലെ വാഴൂരില്‍ ജനിച്ച ഫാ. മാത്യു 1964 ഡിസംബര്‍ ഒന്നിനാണ് പൗരോഹിത്യം സ്വീകരിച്ചത്. 1973ല്‍ രാജ്‌കോട്ടിലെത്തിയ അദ്ദേഹം നാലു പതിറ്റാണ്ടിലേറെ ഗുജറാത്തിലെ പ്രേഷിതപ്രവര്‍ത്തനങ്ങളില്‍ പങ്കുചേര്‍ന്നു. ഗാന്ധിധാം, ഭുജ്, ഭാവ്‌നഗര്‍, സിഹോര്‍, പാലിതാന തുടങ്ങിയ പ്രദേശങ്ങളില്‍ ദേവാലയങ്ങള്‍, വിദ്യാഭ്യാസസ്ഥാപനങ്ങള്‍, മിഷന്‍ കേന്ദ്രങ്ങള്‍ എന്നിവ സ്ഥാപിക്കുന്നതില്‍ നിര്‍ണായക പങ്കുവഹിച്ചു.
ഭുജിലെ സെന്‍റ് സേവ്യേഴ്‌സ് സ്‌കൂളിന്‍റെ വികസനം, കണ്ട്‌ലയിലെ നാവികര്‍ക്കായുള്ള ദേവാലയസ്ഥാപനം, കച്ച് വികാസ് ട്രസ്റ്റിന്‍റെ പ്രവര്‍ത്തനങ്ങള്‍ക്ക് അടിത്തറയിട്ട ഭൂമി ഏറ്റെടുക്കല്‍ എന്നിവ അദ്ദേഹത്തിന്‍റെ സംഭാവനകളാണ്. രാജ്‌കോട്ടിന്‍റെ പ്രഥമ മെത്രാനായിരുന്ന അന്തരിച്ച മാര്‍ ജോനാസ് തളിയത്ത് സിഎംഐ ഫാ.മാത്യുവിനെ സ്‌നേഹപൂര്‍വം വിശേഷിപ്പിച്ചത് അദ്ഭുദങ്ങള്‍ പ്രവര്‍ത്തിക്കുന്നവന്‍ എന്നാണ്. മാര്‍ ഗ്രിഗറി കരോട്ടെമ്പ്രല്‍ സിഎംഐ, മാര്‍ ജോസ് ചിറ്റൂപ്പറമ്പില്‍ സിഎംഐ എന്നിവരുടെ കാലത്തും ഫാ. മാത്യു കളത്തൂര്‍ കര്‍മനിരതനായിരുന്നു.
19 വര്‍ഷം രാജ്‌കോട്ട് രൂപതയുടെ വികാരി ജനറാള്‍, സിഎംഐ മിഷന്‍ സുപ്പീരിയര്‍, 2008ല്‍ സിഎംഐ ചാവറ റീജണല്‍ സുപ്പീരിയര്‍ എന്നി ചുമതലകളും വഹിച്ചു. അവസാനകാലം ചെറുവാണ്ടൂരിലെ ചാവറഭവനില്‍ പ്രാര്‍ഥനയിലും ധ്യാനത്തിലും ചെലവഴിക്കുകയായിരുന്നു അദ്ദേഹം. ഫാ. മാത്യു കളത്തൂരിന്‍റെ സംസ്‌കാരം ഇന്നു രണ്ടിനു മുത്തോലി സെന്‍റ ് ജോണ്‍സ് ആശ്രമത്തില്‍ നടക്കും.
Deepika
Corehub Solutions
E-paper LOGIN
LOGIN
