എരുമേലി: മണിമല പഞ്ചായത്തിലെ അഞ്ചു വാർഡുകളിൽ കുടിവെള്ളം എത്തിക്കുന്നതിന് തയാറാക്കിയ മുക്കട കുടിവെള്ള പദ്ധതിയുടെ തടസങ്ങൾ നീങ്ങിയതായി പ്രഫ. റോണി കെ. ബേബി എംഎൽഎ അറിയിച്ചു. മന്ത്രിതലത്തിലും ജില്ലാ കളക്ടർ ചേതൻ കുമാർ മീണയുടെ അധ്യക്ഷതയിൽ ചേർന്ന യോഗത്തിലും എടുത്ത തീരുമാനങ്ങളുടെ അടിസ്ഥാനത്തിൽ മുക്കട കുടിവെള്ള പദ്ധതി ഒരു വർഷത്തിനകം പൂർത്തീകരിക്കാൻ തീരുമാനമായി.
മുക്കടയിൽ കുടിവെള്ള പദ്ധതിക്കുവേണ്ടി സ്ഥാപിക്കുന്ന ജലസംഭരണിക്ക് സ്ഥലം വിട്ടുനൽകാൻ പട്ടികജാതി വികസനവകുപ്പും പദ്ധതിയുടെ ഭാഗമായി കരിമ്പിൻതോടിനും മുക്കടക്കും ഇടയിൽ വനഭൂമിയിൽ പൈപ്പുകൾ ഇടുന്നതിന് വനം വകുപ്പും അനുമതികൾ നൽകാൻ സമ്മതിച്ചതോടെയാണ് കുടിവെള്ള പദ്ധതി യാഥാർഥ്യമാകുന്നത്.
മണിമല പഞ്ചായത്തിലെ ആറ്, ഏഴ്, എട്ട് വാർഡുകളിൽ പൂർണമായും നാല്, അഞ്ച് വാർഡുകളിൽ ഭാഗികമായും 1500ഓളം കുടുംബങ്ങൾക്ക് പ്രയോജനകരമായ പദ്ധതിയാണ് മുക്കട കുടിവെള്ള പദ്ധതി. വേനൽക്കാലമാകുമ്പോൾ രൂക്ഷമായ കുടിവെള്ളക്ഷാമം നേരിടുന്ന പ്രദേശമാണിത്. പട്ടികജാതി വികസന വകുപ്പ് വിട്ടുനൽകുന്ന സ്ഥലത്ത് മൂന്നു ലക്ഷം ലിറ്റർ ശേഷിയുള്ള ജലസംഭരണിയാണ് നിർമിക്കുന്നത്. ജൽ ജീവൻ മിഷന്റെ ഭാഗമായിട്ടാണ് കുടിവെള്ളപദ്ധതി നടപ്പാക്കുന്നത്. പെരുന്തേനരുവിയിൽനിന്നാണ് പദ്ധതിക്ക് ആവശ്യമായ ജലമെത്തുന്നത്.
ജില്ലാ കളക്ടറുമായി നടന്ന ചർച്ചയിൽ റോണി കെ. ബേബി എംഎൽഎ, പഞ്ചായത്ത് പ്രസിഡന്റ് ലിതാ ഷാജി, വൈസ് പ്രസിഡന്റ് ബി.സി. ജയദാസ്, പഞ്ചായത്തംഗങ്ങളായ ബോബി ജേക്കബ്, ജയശ്രീ ഗോപിദാസ്, സുജ ബാബു എന്നിവർ പങ്കെടുത്തു.