ന്യൂഡൽഹി: ഇന്ത്യ ഭീകരവാദത്തിനെതിരെ തെളിവ് നൽകിയാൽ നടപടിയെടുക്കുമെന്ന് പാക്കിസ്ഥാൻ മന്ത്രി മുസാദിക് മസൂദ് മാലിക്. പരസ്പര പ്രകോപനമല്ല വേണ്ടതെന്നും ശാശ്വത പരിഹാരമാണ് ആവശ്യമെന്നും അദ്ദേഹം പറഞ്ഞു.
ഭീകരവാദത്തിനെതിരായ എല്ലാ ചർച്ചകളും തെളിവുകളുടെ അടിസ്ഥാനത്തിൽ മാത്രമെന്നും പാക് മന്ത്രി വ്യക്തമാക്കി. സിന്ധുനദീജല ഉടമ്പടിയെപ്പറ്റി ചർച്ച ചെയ്യാൻ ക്ഷണിച്ചാൽ എത്തുമെന്നും ഇപ്പോൾ അതിനല്ല ഇന്ത്യയിൽ എത്തിയതെന്നും മുസാദിക് മസൂദ് മാലിക് പറഞ്ഞു.
ഷാംഗ്ഹായ് സഹകരണ സംഘടനയുടെ പരിപാടിയിൽ പങ്കെടുക്കാനാണ് മസൂദ് മാലിക് പ്രധാനമായും ഇന്ത്യയിൽ എത്തിയത്. ഇന്ത്യയിലെത്തിയ പാക് മന്ത്രിക്ക് താജ്മഹൽ സന്ദർശിക്കാൻ കേന്ദ്രസർക്കാർ അനുമതി നൽകിയത് നേരത്തേ വിദേശകാര്യ മന്ത്രാലയം അറിയിച്ചിരുന്നു.