ഇംഫാൽ: സായുധസംഘം നാഗാവിഭാഗക്കാരായ ആറുപേരെ തട്ടിക്കൊണ്ടുപോയതുമായി ബന്ധപ്പെട്ട കേസ് ദേശീയ അന്വേഷണ ഏജൻസിക്കു (എൻഐഎ) കൈമാറുമെന്ന് മണിപ്പൂർ മുഖ്യമന്ത്രി വൈ. ഖേംചന്ദ് സിംഗ്. ആറംഗ യുണൈറ്റഡ് നാഗാ കൗൺസിലിൽ (യുഎൻസി) പ്രതിനിധികളുമായി നടത്തിയ കൂടിക്കാഴ്ചയിലാണു മുഖ്യമന്ത്രിയുടെ പ്രഖ്യാപനം.
പ്രസിഡന്റ് എൻജി ലോർഹോയുടെ നേതൃത്വത്തിലുള്ള യുഎൻസി സംഘവും മുഖ്യമന്ത്രിയുമായി നടത്തിയ ചർച്ചയിൽ ഉപമുഖ്യമന്ത്രി ലോസി ദിഖോ, ആഭ്യന്തര മന്ത്രി ഗോവിന്ദസ് കൊന്തൂജം എന്നിവർക്കുപുറമേ നാഗ എംഎൽഎമാരും പങ്കെടുത്തു. കാംഗ്പോക്പിയിലെ കോൺസഖുലിൽനിന്നു തട്ടിക്കൊണ്ടുപോയ ആറ് ഗ്രാമീണരെ കണ്ടെത്തുന്നതിനുള്ള ശ്രമം ശക്തമാക്കണമെന്ന് യുഎൻസി സർക്കാരിനോട് ആവശ്യപ്പെട്ടു. ഇതേത്തുടർന്നാണ് കേസ് എൻഐഎയ്ക്കു കൈമാറുമെന്ന് മുഖ്യമന്ത്രി ഉറപ്പ് നൽകിയത്.