നീലേശ്വരം: ദേശീയപാത വികസനത്തിന്റെ ഭാഗമായി നീലേശ്വരത്ത് നടപ്പിലാക്കുന്ന അശാസ്ത്രീയമായ നിര്മാണപ്രവര്ത്തനങ്ങള് നാടിന്റെ സുരക്ഷയ്ക്കും നിലനില്പ്പിനും ഭീഷണിയാകുമെന്ന ആശങ്ക ഉയരുന്നു. വികസനത്തിന്റെ പേരില് നഗരത്തെ വെട്ടിമുറിച്ച് ഉയര്ത്തുന്ന കൂറ്റന് മണ്മതിലുകള് വരുംകാലത്ത് വന് ദുരന്തങ്ങള്ക്ക് വഴിവയ്ക്കുമെന്ന ആശങ്കയിലാണ് നാട്ടുകാര്. ആദ്യ പദ്ധതി രേഖയില് (ഡിപിആര്) വിഭാവനം ചെയ്ത ആകാശപാത അട്ടിമറിച്ച് ടണ് കണക്കിന് മണ്ണു നിറച്ച് ഭിത്തി കെട്ടി ഉയരപാത നിര്മിക്കുന്നത് നീലേശ്വരത്തിന്റെ ചരമക്കുറിപ്പ് എഴുതുന്നതിന് തുല്യമാണെന്ന് ജനകീയസമരസമിതി ആരോപിക്കുന്നു.
തൂണുകളിന്മേല് നിര്മിക്കേണ്ട ആകാശപാതയ്ക്ക് പകരം കോണ്ക്രീറ്റ് ഭിത്തികള്ക്കിടയില് മണ്ണ് നിറയ്ക്കുന്ന രീതിയാണ് ഇപ്പോള് അവലംബിക്കുന്നത്. ഇതു മഴക്കാലത്ത് മണ്ണിലേക്ക് നീരുറവകള് ഇറങ്ങുന്നതിനും ഭിത്തികളില് സമ്മര്ദ്ദം ഏറുന്നതിനും കാരണമാകും. ഇത്തരത്തില് മണ്കൂനകള് ഇടിഞ്ഞുവീഴാനുള്ള സാധ്യത നിലനില്ക്കുന്നത് പാതയോരത്തെ വിദ്യാലയങ്ങള്ക്കും പെട്രോള് പമ്പുകള്ക്കും മറ്റു വ്യാപാര സ്ഥാപനങ്ങള്ക്കും വന് സുരക്ഷാ ഭീഷണിയാണ് ഉയര്ത്തുന്നത്. കൂടാതെ, നഗരത്തിന്റെ സ്വാഭാവികമായ നീരൊഴുക്ക് തടസപ്പെടുന്നത് വെള്ളക്കെട്ടിനും കാരണമാകും.
നിടുങ്കണ്ടം മുതല് കരുവാച്ചേരി വരെ ആകാശപാത നിര്മിച്ചിരുന്നെങ്കില് നീലേശ്വരം നഗരത്തിനും ചന്ത കവലയ്ക്കും വന് വികസന സാധ്യതകള് കൈവരുമായിരുന്നു. എന്നാല് നിലവിലെ നിര്മാണം നീലേശ്വരത്തിന്റെ പ്രവേശന കവാടമായ ചന്ത കവലയെ പൂര്ണമായും അടച്ചിരിക്കുകയാണ്. റെയില്വേ സ്റ്റേഷന്, ബസ്സ്റ്റാന്ഡ്, താലൂക്ക് ആശുപത്രി, സ്കൂളുകള്, സര്ക്കാര് ഓഫീസുകള് എന്നിവിടങ്ങളിലേക്ക് എത്താന് സാധിക്കാത്ത വിധം വഴികള് കൊട്ടിയടയ്ക്കപ്പെട്ടു.
ദീര്ഘദൂര ബസുകള് നഗരത്തെ ഒഴിവാക്കി പോകാന് തുടങ്ങുന്നതോടെ നീലേശ്വരം ഒരു ഒറ്റപ്പെട്ട ദ്വീപിന് സമാനമായി മാറും. കാര്ഷിക-മത്സ്യ വിപണന മേഖലയെയും ഈ നിര്മാണം സാരമായി ബാധിച്ചിട്ടുണ്ട്. കിഴക്കന് മേഖലയില് നിന്നുള്ള കാര്ഷിക ഉത്പന്നങ്ങളുടെ വിപണനം നിലയ്ക്കുന്നതോടെ വ്യാപാരികള് മറ്റു പട്ടണങ്ങളെ ആശ്രയിക്കേണ്ടി വരും. കോട്ടപ്പുറം റോഡ് കൂടി അടയുന്നതോടെ തൈക്കടപ്പുറം, അച്ചാംതുരുത്തി, കടിഞ്ഞിമൂല മേഖലയിലുള്ളവര്ക്ക് ടൗണിലെത്താന് കിലോമീറ്ററുകള് അധികം സഞ്ചരിക്കേണ്ടി വരുന്നു.
നീലേശ്വരം പുഴയ്ക്ക് കുറുകെയുള്ള പഴയ പാലം അതീവ അപകടാവസ്ഥയിലായിട്ടും പുതിയ പാലം പണിയുന്ന കാര്യത്തില് ദേശീയപാത അഥോറിറ്റി നിസംഗത തുടരുകയാണ്. പദ്ധതി രേഖ പ്രകാരമുള്ള പുതിയ പാലത്തിന്റെ നിര്മാണം പതിവഴിയില് നിലച്ചതും ആറുവരി പാതയ്ക്കു പകരം ഇവിടെ അഞ്ചുവരി പാതയായി ചുരുക്കിയതും ദുരൂഹതയുണര്ത്തുന്നതായി സമരക്കാര് ആരോപിക്കും.
ദേശീയ ജലപാതയ്ക്ക് പോലും തടസമാകുന്ന രീതിയില് പഴയ പാലം നിലനിര്ത്തുന്നത് ആരുടെ താത്പര്യപ്രകാരമാണെന്ന ചോദ്യവും ഉയരുന്നുണ്ട്. വിഷയത്തില് ജനപ്രതിനിധികളും രാഷ്ട്രീയ പാര്ട്ടികളും നഗരസഭയും ഇത്രയും കാലം പുലര്ത്തിയ മൗനത്തിനെതിരേ വലിയ ജനരോഷമാണ് ഉയരുന്നത്. പദ്ധതി അട്ടിമറിക്കപ്പെട്ടത് അറിഞ്ഞിട്ടും ഇവര് മൗനം പാലിച്ചത് ആരുടെ സമ്മര്ദ്ദത്തിന് വഴങ്ങിയാണെന്ന് നാട്ടുകാര് ചോദിക്കുന്നു.
നിലവില് രാഷ്ട്രീയ പാര്ട്ടികള് നടത്തുന്ന സമരങ്ങള് ജനകീയ സമരത്തെ ഭയന്നുള്ള നാടകങ്ങള് മാത്രമാണെന്നും ജനങ്ങളെ വീണ്ടും വിഡ്ഢികളാക്കാനാണ് ഇവര് ശ്രമിക്കുന്നതെന്നും സമരസമിതി കുറ്റപ്പെടുത്തി. നിടുങ്കണ്ടം-കരുവാച്ചേരി ആകാശപാത അനുവദിക്കുന്നത് വരെ എന്തു ത്യാഗം സഹിച്ചും പോരാട്ടം തുടരുമെന്ന് ജനകീയ സമരസമിതി വ്യക്തമാക്കി.