കണ്ണൂർ: കേരളത്തിലെ നഴ്സിംഗ് ഉദ്യോഗാർഥികളുടെ മികവ് പരിഗണിച്ച് Aഅവരെ ഓസ്ട്രേലിയൻ തൊഴിൽ മേഖലകളിൽ ആകർഷിക്കുന്നതിനുള്ള നടപടികൾ സ്വീകരിക്കുമെന്ന് ഓസ്ട്രേലിയൻ കോൺസൽ ജനറൽ സിലൈ സാക്കി. മലബാർ കാൻസർ സെന്ററിന് കീഴിലുള്ള നഴ്സിംഗ് ഇൻസ്റ്റിറ്റ്യൂട്ടിലെ വിദ്യാർഥികൾക്ക് പഠനശേഷം ഓസ്ട്രേലിയയിൽ ജോലി ചെയ്യുന്നതിനുള്ള അവസരങ്ങൾ ഒരുക്കുമെന്ന് കോൺസൽ ജനറൽ ഉറപ്പുനൽകി. സ്പീക്കർ എ.എൻ. ഷംസീറുമായി തലശേരിയിൽ നടത്തിയ കൂടിക്കാഴ്ചയിലാണ് കോൺസൽ ജനറൽ ഇക്കാര്യങ്ങൾ അറിയിച്ചത്.
പുതുതായി ചുമതലയേറ്റ ഓസ്ട്രേലിയൻ കോൺസൽ ജനറൽ സിലൈ സാക്കിയുടെ നേതൃത്വത്തിലുള്ള പ്രതിനിധിസംഘത്തിന്റെ കേരള സന്ദർശനത്തിന്റെ ഭാഗമായാണ് സ്പീക്കർ എ.എൻ. ഷംസീറുമായി കൂടിക്കാഴ്ച നടത്തിയത്.
വിദ്യാഭ്യാസ, വ്യവസായ മേഖലകളിൽ കേരളവുമായി കൂടുതൽ സഹകരിക്കാൻ ഓസ്ട്രേലിയ തയാറാണെന്ന് സിലൈ സാക്കി അറിയിച്ചതായി സ്പീക്കർ പറഞ്ഞു. കേരളവും ഓസ്ട്രേലിയയും തമ്മിലുള്ള ഉഭയകക്ഷി ബന്ധം ശക്തിപ്പെടുത്തുന്നതിനും പുതിയ നിക്ഷേപ സാധ്യതകൾ കണ്ടെത്തുന്നതിനും ഈ കൂടിക്കാഴ്ച വഴിയൊരുക്കിയതായും അദ്ദേഹം അറിയിച്ചു. സീനിയർ അഡ്വൈസർ ജാനകി ശ്രീരാം, സ്പീക്കറുടെ അഡീഷണൽ പ്രൈവറ്റ് സെക്രട്ടറി എസ്.കെ. അർജുൻ എന്നിവരും കൂടിക്കാഴ്ചയിൽ പങ്കെടുത്തു.