കൊല്ലങ്കോട്: ഊട്ടറ ഗായത്രിപ്പുഴപ്പാലം നിർമാണപൂർത്തീകരണം വൈകുന്നതിനാൽ യാത്രക്ലേശം വർധിക്കുന്നു. ആധുനിക സാങ്കേതിക പരിജ്ഞാനരീതിയിൽ പാലം ആറുമാസത്തിനകം പൂർത്തീകരിക്കുമെന്ന് ഉറപ്പ് നൽകിയാണ് ഗോവ സ്വദേശിയായ കരാറുകാരൻ പണികൾ ആരംഭിച്ചത്. എന്നാൽ ഒരു വർഷം കഴിഞ്ഞിട്ടും എങ്ങും എത്താത്ത അവസ്ഥയിലാണുള്ളത്.
നിലവിൽ പഴയ മേൽപാലത്തിൽ ഇടുങ്ങിയ വഴിയിലുടെ വാഹനസഞ്ചാരം ഭീതിജനകമാണ്. നിലവിലെ സാഹചര്യം കണക്കാക്കിയാൽ പൂർത്തീകരണത്തിന് ഇനിയുംആറുമാസം വേണ്ടി വരും. രാത്രിസമയങ്ങളിൽ പഴയ പാലത്തിലുടെ വാഹനങ്ങൾ നിരങ്ങി നീങ്ങിയാണ് മറുവശം എത്തുന്നത്. കാൽനട ഇരുചക്ര വാഹന യാത്ര അപകട മുനമ്പിലാണ്. ദുർബലമായ കൈവരിയും അപകടസാധ്യത കൂട്ടുകയാണ്. ഡിസംബറിൽ ആരംഭിക്കുന്ന കൊല്ലങ്കോട് അയ്യപ്പൻ വിളക്ക് മഹോത്സവത്തിൽ ടൗണിൽ എഴുന്നെള്ളിപ്പ് എത്തിയാൽ വാഹന സഞ്ചാരം പൂർണമായും നിശ്ചലമാവും. ഉത്സവ സമയങ്ങളിൽ ആലമ്പള്ളം നിലമ്പതി വഴിയാണ് വാഹനങ്ങൾ മുന്പ് തിരിച്ചു വിട്ടിരുന്നത്. അവിടേയും മേൽപ്പാലം പണി അപൂർണതയിലാണ്. നിർമാണം പൂർത്തിയായ പാലത്തിന്റെ അപ്രോച്ച് റോഡ് നിർമാണം സ്തംഭനാവസ്ഥയിലാണ്. ഇതിനുള്ള തുക കണ്ടെത്തിയാലെ തുടർനടപടികൾ ഉണ്ടാവുകയുള്ളു എന്നാണ് അധികൃതർ അറിയിക്കുന്നത്. എലഞ്ചേരി കുമ്പളക്കോട് പാലവും നിർജീവാവസ്ഥയിലാണുള്ളത്. പാലത്തിന്റെ അടിഭാഗം കോൺക്രീറ്റ് ഇളകി ബലക്ഷയം ഉണ്ടായിരിക്കുകയാണ്.
ടൗണിൽ ഗതാഗത കുരുക്ക് മുറുകിയാൽ വ്യാപാരമാന്ദ്യം ഉണ്ടാകുന്നതായി വ്യാപാരികളും പറയുന്നു. ഗായത്രിപ്പുഴ മേൽപ്പാലം പണി പൂർത്തിയാക്കാതെ ആലമ്പള്ളം പാലം പൊളിച്ച് പണി തുടങ്ങിയത് തീർത്തും അനുചിതമായെന്നാണ് നാട്ടുകാർ പറയുന്നത്.