ഭുവനേശ്വര്: ഒഡീഷയിലെ ധെന്കനാലില് പാസ്റ്ററെ ക്രൂരമായി മര്ദ്ദിക്കുകയും അപമാനിക്കുകയും ചെയ്ത സംഭവത്തില് നാല് പേരെ പോലീസ് കസ്റ്റഡിയിലെടുത്തു. നിര്ബന്ധിത മതപരിവര്ത്തനം നടത്തുന്നു എന്ന് ആരോപിച്ചായിരുന്നു ഒരു സംഘം ആളുകള് പാസ്റ്റര്ക്ക് നേരെ അക്രമം നടത്തിയത്.
കഴിഞ്ഞ ദിവസം ഗ്രാമത്തിലെത്തിയ പാസ്റ്ററെ ഒരു സംഘം തടഞ്ഞുനിര്ത്തുകയും ചോദ്യം ചെയ്യുകയുമായിരുന്നു. തര്ക്കത്തിനിടയില് അക്രമിസംഘം ഇദ്ദേഹത്തെ മര്ദ്ദിക്കുകയും ബലമായി തല മുണ്ഡനം ചെയ്ത് അപമാനിക്കാന് ശ്രമിക്കുകയുമായിരുന്നു.
പാസ്റ്റര് ഗ്രാമവാസികളെ പ്രലോഭിപ്പിച്ച് മതപരിവര്ത്തനത്തിന് പ്രേരിപ്പിക്കുന്നു എന്നായിരുന്നു അക്രമികളുടെ വാദം. എന്നാല് ഈ ആരോപണം പാസ്റ്ററും ബന്ധുക്കളും നിഷേധിച്ചിട്ടുണ്ട്.
മര്ദ്ദനത്തിന്റെ ദൃശ്യങ്ങള് സമൂഹമാധ്യമങ്ങളില് പ്രചരിച്ചെങ്കിലും പത്ത് ദിവസങ്ങള്ക്ക് ശേഷമാണ് പോലീസ് കേസെടുത്തത്. സിസിടിവി ദൃശ്യങ്ങളും മൊബൈല് വീഡിയോകളും പരിശോധിച്ചാണ് പ്രതികളെ തിരിച്ചറിഞ്ഞത്. നിലവില് കസ്റ്റഡിയിലുള്ള നാല് പേരെയും പോലീസ് ചോദ്യം ചെയ്തു വരികയാണ്.
Deepika
E-paper LOGIN
LOGIN
