ചങ്ങനാശേരി: ചങ്ങനാശേരി അതിരൂപതയുടെ മുന് ആര്ച്ച്ബിഷപ് മാര് ജോസഫ് പവ്വത്തിലിന്റെ സ്മരണാര്ഥം ആര്ച്ച്ബിഷപ് ജോസഫ് പവ്വത്തില് ഫൗണ്ടേഷന് (എജെപിഎഫ്) രൂപീകരിച്ചു. 15 അംഗ ട്രസ്റ്റിന്റെ പേട്രന് ആര്ച്ച്ബിഷപ് മാര് തോമസ് തറയിലാണ്.
ഷംഷാബാദ് രൂപത സഹായമെത്രാന് മാര് തോമസ് പാടിയത്ത് ആദ്യ ട്രസ്റ്റിയും എംജി സര്വകലാശാല മുന് വൈസ്ചാന്സിലര് ഡോ. സിറിയക് തോമസ് മാനേജിംഗ് ട്രസ്റ്റിയും ഡോ. പി.ജെ. തോമസ് സെക്രട്ടറിയുമാണ്. ചങ്ങനാശേരി ആര്ച്ച്ബിഷപ്സ് ഹൗസിലാണ് ഫൗണ്ടേഷന്റെ ആസ്ഥാനം.
21ന് ഉച്ചകഴിഞ്ഞ് 2.30ന് ചങ്ങനാശേരി കുരിശുംമൂട് മീഡിയവില്ലേജില് ചേരുന്ന സമ്മേളനത്തില് മുംബൈ മുന് ആര്ച്ച്ബിഷപ് കര്ദിനാള് മാര് ഓസ്വാള്ഡ് ഗ്രേഷ്യസ് ഫൗണ്ടേഷന്റെ ഉദ്ഘാടനം നിര്വഹിക്കും.
സീറോമലബാര് സഭ മേജര് ആര്ച്ച്ബിഷപ് മാര് റാഫേല് തട്ടില് അധ്യക്ഷത വഹിക്കും. ആര്ച്ച്ബിഷപ് മാര് തോമസ് തറയില് അനുഗ്രഹ പ്രഭാഷണം നടത്തും. പാലാ ബിഷപ് മാര് ജോസഫ് കല്ലറങ്ങാട്ട്, ആര്ച്ച്ബിഷപ് എമരിറ്റസ് മാര് ജോസഫ് പെരുന്തോട്ടം, കാഞ്ഞിരപ്പള്ളി ബിഷപ് മാര് ജോസ് പുളിക്കല്, ഡോ. സിറിയക് തോമസ്, ഡോ. ജാന്സി ജയിംസ്, പ്രഫ. മുരളീവല്ലഭന്, ഡോ. പി.ജെ. തോമസ് എന്നിവര് പ്രസംഗിക്കും. മാര് ജോസഫ് പവ്വത്തില് നടത്തിയ പ്രവര്ത്തനങ്ങളും ആശയങ്ങളും സംബന്ധിച്ച ഗവേഷണം, പഠനം, പ്രസിദ്ധീകരണം എന്നിവയുടെ പ്രോത്സാഹനം, വിദ്യാഭ്യാസം, ന്യൂനപക്ഷാവകാശങ്ങള് എന്നിവയില് ശ്രദ്ധേയമായ സംഭാവനകള് നല്കിയവരെ ആദരിക്കല്, സിവില് സര്വീസ് വിദ്യാര്ഥികള്ക്ക് സ്കോളര്ഷിപ്പ്, ഭിന്നശേഷിക്കാര്ക്കായി പ്രവര്ത്തിക്കുന്നവരെ സഹായിക്കൽ, ദളിത് വിദ്യാര്ഥികളുടെ വിദ്യാഭ്യാസ, തെഴില് പ്രോത്സാഹനം തുടങ്ങിയവ ഫൗണ്ടേഷന്റെ മുഖ്യ കര്മപദ്ധതികളില്പ്പെടുന്നു.
Deepika
E-paper LOGIN
LOGIN
