കോട്ടയം: പ്ലസ് വണ് പ്രവേശനത്തിനായി ഏകജാലക രീതിയില് ജൂണ് മൂന്നുവരെ അപേക്ഷ നല്കാം. സിബിഎസ്ഇ, ടിഎച്ച്എസ്എല്സി ഉള്പ്പെടെ മറ്റു സ്കീമുകളില് പഠിച്ചു ജയിച്ചവര്ക്കും അപേക്ഷിക്കാം.
https://hscap.kerala.gov.in എന്ന വെബ്സൈറ്റ് വഴിയാണ് അപേക്ഷ സമര്പ്പിക്കേണ്ടത്. ഒരു ജില്ലയിലെ എല്ലാ സ്കൂളുകള്ക്കുമായി ഒറ്റ അപേക്ഷ മതി. ജൂണ് എട്ടിനു ട്രയല് അലോട്ട്മെന്റ്. 15ന് ആദ്യ അലോട്ട്മെന്റ്. ജൂലൈ രണ്ടിനു ക്ലാസുകള് ആരംഭിക്കും. സപ്ലിമെന്ററി ഘട്ടം ജൂലൈ 13 മുതല് ഓഗസ്റ്റ് അഞ്ചു വരെയാണ്. പ്രവേശന നടപടികള് ഓഗസ്റ്റ് അഞ്ചിനു അവസാനിക്കും.
അപേക്ഷ നല്കേണ്ടത് ഇങ്ങനെ:
https://hscap.kerala.gov.in/ എന്ന വെബ്സൈറ്റ് സന്ദര്ശിക്കുക
CREATE CANDIDATE LOGIN-SWS എന്ന ലിങ്ക് തുറക്കുക
അപേക്ഷിക്കാന് ഉദ്ദേശിക്കുന്ന ജില്ല തെരഞ്ഞെടുക്കണം
ലോഗിന് പേജില് എസ്എസ്എല്സി സ്കീം, രജിസ്റ്റര് നമ്പര്, പേര് തുടങ്ങിയവ നല്കി സബ്മിറ്റ് ചെയ്യണം.
മൊബൈല് നമ്പറില് വരുന്ന ഒടിപി നല്കിയ ശേഷം പാസ്വേഡ് സൃഷ്ടിക്കണം.
ലഭിക്കുന്ന അപേക്ഷാനമ്പറും തൊട്ടുമുന്പ് സൃഷ്ടിച്ച പാസ്വേഡും എഴുതിസൂക്ഷിക്കണം.
വെബ്സൈറ്റിലുള്ള CANDIDATE LOGIN - SWS എന്ന ലിങ്ക് വഴി അപേക്ഷാ നമ്പറും പാസ്വേഡും ജില്ലയും കൊടുത്ത് ലോഗിന് ചെയ്യണം.
അപ്ലൈ ഓണ്ലൈന് എന്ന ലിങ്ക് വഴി പ്രവേശിച്ച് വിലാസം, പാഠ്യേതര പ്രവര്ത്തനങ്ങള്, ഗ്രേഡ് പോയിന്റുകള് എന്നിവ നല്കണം.
തുടര്ന്ന് ഓപ്ഷന് നല്കാനുള്ള വിന്ഡോ തുറക്കും. ഇവിടെ അപേക്ഷ നല്കാനുദ്ദേശിക്കുന്ന സ്കൂളിന്റെ കോഡ്, കോഴ്സ് കോഡ് എന്നിവ നല്കണം (കോഡുകള് സൈറ്റില് നല്കിയിട്ടുള്ള അപ്പന്ഡിക്സില് കാണാം).
ആവശ്യമുള്ളത്രയും ഓപ്ഷനുകള് നല്കുക.
സ്കീം അദേഴ്സ് എന്നു തെരഞ്ഞെടുത്തവര് മാര്ക്ക് ലിസ്റ്റ്, തുല്യത, മൈഗ്രേഷന് സര്ട്ടിഫിക്കറ്റുകള് എന്നിവയും ഭിന്നശേഷിക്കാര് മെഡിക്കല് ബോര്ഡ് സര്ട്ടിഫിക്കറ്റും അപ്ലോഡ് ചെയ്യണം.
ഓപ്ഷനുകള് സബ്മിറ്റ് ചെയ്തശേഷം അപേക്ഷയിലെ വിവരങ്ങള് ഒരിക്കല്കൂടി കാണാനും ആവശ്യമെങ്കില് തിരുത്താനും അവസരമുണ്ട്.
ഇതു പരിശോധിച്ചശേഷം അപേക്ഷാസമര്പ്പണം പൂര്ത്തിയാക്കാം.
ട്രയല് അലോട്ട്മെന്റിനു ശേഷം ആവശ്യമെങ്കില് സൈറ്റില് ലോഗിന് ചെയ്ത് നല്കിയ വിവരങ്ങളിലെ തെറ്റുകള് തിരുത്താനും ഓപ്ഷനുകള് മാറ്റാനും അവസരമുണ്ട്.
ശ്രദ്ധിക്കേണ്ട കാര്യങ്ങള്
വെബ്സൈറ്റിൽ നല്കിയിട്ടുള്ള പ്രോസ്പെക്ടസ്, യൂസര് മാന്വല് എന്നിവ നിര്ബന്ധമായി വായിച്ച ശേഷം മാത്രം അപേക്ഷിക്കുക.
പ്രോസ്പെക്ടസിനൊപ്പം നല്കിയിട്ടുള്ള അനുബന്ധങ്ങള് ക്ലിക്ക് ചെയ്ത് കാറ്റഗറി, സ്കൂള് കോഡ്, കോഴ്സ് കോഡ് എന്നിവ മനസിലാക്കണം.
ഓപ്ഷനുകളായി നല്കാന് ആഗ്രഹിക്കുന്ന സ്കൂള്, കോഴ്സ് കോഡുകള് മുന്കൂട്ടി ഒരു പട്ടികയായി തയാറാക്കി വയ്ക്കുക.
പൂര്ണമായി ഓണ്ലൈനായാണ് അപേക്ഷ. പ്രിന്റൗട്ട് എവിടെയും അയച്ചുകൊടുക്കേണ്ടതില്ല.
10-ാം ക്ലാസിലെ സ്കീം അദേഴ്സ് എന്നു തെരഞ്ഞെടുത്തവരും ഭിന്നശേഷിക്കാരും ഒഴികെയുള്ള അപേക്ഷകര് ഒരു രേഖയും അപ്ലോഡ് ചെയ്യേണ്ടതില്ല.
അപേക്ഷാനമ്പറും പാസ്വേഡും എഴുതി സൂക്ഷിച്ചുവയ്ക്കണം.
അപേക്ഷാസമയത്ത് നല്കുന്ന മൊബൈല് നമ്പര് രക്ഷിതാവിന്റേതോ വിദ്യാര്ഥിയുടേതോ ആകണം. പത്താംക്ലാസ് സര്ട്ടിഫിക്കറ്റ്/മാര്ക്ക് ലിസ്റ്റ് കൈയില് കരുതണം.
Deepika
E-paper LOGIN
LOGIN