മൂവാറ്റുപുഴ: സമാധാനപരവും പ്രശ്നരഹിതവുമായ തെരഞ്ഞെടുപ്പ് നടത്തുക എന്ന ലക്ഷ്യത്തോടെ പോലീസിന്റെ കനത്ത സംവിധാനങ്ങളും സാന്നിധ്യവും ഉറപ്പുവരുത്താന് മൂവാറ്റുപുഴ ഡിവൈഎസ്പിയുടെ കീഴിലുള്ള പോലീസ് സ്റ്റേഷനുകളിലെ ഉദ്യോഗസ്ഥര് റൂട്ട് മാര്ച്ച് നടത്തി. പോലീസുകാര്ക്കൊപ്പം ഇന്ഡോ ടിബറ്റന് ബോര്ഡര് ഫോഴ്സ് ഉള്പ്പെടെയുള്ളവരും അണിനിരന്നു.
മൂവാറ്റുപുഴ പുളിഞ്ചോട് ജംഗ്ഷനില് നിന്നും ആരംഭിച്ച റൂട്ട്മാര്ച്ച് പേഴയ്ക്കാപ്പിള്ളി ജംഗ്ഷനില് സമാപിച്ചു. മൂവാറ്റുപുഴ ഡിവൈഎസ്പിക്ക് കീഴിലുള്ള വാഴക്കുളം, കല്ലൂര്ക്കാട്, പോത്താനിക്കാട്, കോതമംഗലം, കുട്ടമ്പുഴ, ഊന്നുകല്, മുവാറ്റുപുഴ, മുവാറ്റുപുഴ ട്രാഫിക്, കോതമംഗലം ട്രാഫിക് തുടങ്ങിയ സ്റ്റേഷനുകളിലെ പോലീസുകാര് റൂട്ട് മാര്ച്ചില് പങ്കെടുത്തു.
മൂവാറ്റുപുഴ ഡിവൈഎസ്പി പി. അബ്ദുല് മുനീര്, മൂവാറ്റുപുഴ സ്റ്റേഷന് ഹൗസ് ഓഫീസര് അനില് ജോര്ജ് എന്നിവരുടെ നേതൃത്വത്തിലാണ് റൂട്ട് മാര്ച്ച് നടന്നത്.