ഏഡൻ: തെക്കൻ യെമനിലെ തുറമുഖനഗരമായ ഏഡനിലെ പ്രസിഡൻഷ്യൽ കൊട്ടാരത്തിനുനേരേ ഹൂതി വിമതർ നടത്തിയ മിസൈൽ ആക്രമണത്തിൽ പ്രധാനമന്ത്രി ഡോ. ഷായ അൽ സിന്ദാനിയുടെ രണ്ട് സുരക്ഷാ ഉദ്യോഗസ്ഥർ കൊല്ലപ്പെട്ടു.
അന്താരാഷ്‌ട്രതലത്തിൽ അംഗീകരിക്കപ്പെട്ട യെമൻ സർക്കാരിന്‍റെ ആസ്ഥാനമായ ഏഡനിലെ അൽ മാഷീഖ് കൊട്ടാരത്തിനുനേരേയാണ് അഞ്ച് ബാലിസ്റ്റിക് മിസൈലുകൾ പതിച്ചത്. ഇന്നലെ രാത്രിയായിരുന്നു സംഭവം.
ആക്രമണത്തിൽ പ്രധാനമന്ത്രിയും മറ്റു മന്ത്രിമാരും രക്ഷപ്പെട്ടെങ്കിലും നിരവധി പേർക്കു പരിക്കേറ്റതായി ഇൻഫർമേഷൻ മന്ത്രി മൊവാമ്മർ അൽ ഇര്യാനി അറിയിച്ചു. സൗദി അറേബ്യയുടെ നേതൃത്വത്തിലുള്ള സഖ്യസേനയാണ് യെമൻ സർക്കാരിന് പിന്തുണ നൽകുന്നത്.
സൗദി ഉദ്യോഗസ്ഥരുടെ നേതൃത്വത്തിലുള്ള സൈനിക ഓപ്പറേഷൻ ആസ്ഥാനവും ആയുധപ്പുരകളുമാണ് ലക്ഷ്യമിട്ടതെന്നാണ് ഹൂതി നിയന്ത്രണത്തിലുള്ള മാധ്യമങ്ങളുടെ റിപ്പോർട്ട്.
യെമനിലെ ഹൂതി നിയന്ത്രണത്തിലുള്ള പ്രദേശങ്ങളിൽ സഖ്യസേന നടത്തുന്ന വ്യോമാക്രമണങ്ങൾക്കു മറുപടിയായി ഹൂതികൾ സൗദി അറേബ്യയിലെ വിമാനത്താവളങ്ങൾ, എണ്ണ-വാതക കേന്ദ്രങ്ങൾ, സൈനിക താവളങ്ങൾ എന്നിവയ്ക്കു നേരേയും മിസൈൽ, ഡ്രോൺ ആക്രമണങ്ങൾ നടത്തിവരുന്നുണ്ട്.
അതേസമയം, സൗദി അറേബ്യക്കു നേരേ വർധിച്ചുവരുന്ന ഹൂതി ആക്രമണങ്ങളെ യുഎൻ രക്ഷാസമിതി ശക്തമായി അപലപിച്ചു. യെമനിലേക്കുള്ള ആയുധ ഉപരോധം എല്ലാ അംഗരാജ്യങ്ങളും പാലിക്കണമെന്നും അക്രമങ്ങളിലൂടെ സമാധാനം കൈവരിക്കാനാകില്ലെന്നും രക്ഷാസമിതി ഓർമിപ്പിച്ചു.
Deepika
Corehub Solutions
E-paper LOGIN
LOGIN
