ചെന്നൈ: മുതുമലൈ കടുവാസങ്കേതത്തിലേക്കുള്ള സന്ദർശനത്തിനിടെ തമിഴ്നാട് മന്ത്രി വന്നി അരശു കടുവയ്ക്കു പിന്നാലെ ഓടുന്നതായുള്ള വീഡിയോ വിവാദത്തിൽ. വന്യജീവികളെ ശല്യപ്പെടുത്തിയെന്നാരോപിച്ചു പരിസ്ഥിതിപ്രവർത്തകർ രംഗത്തെത്തിയതോടെ മന്ത്രി പ്രതിരോധത്തിലായി. മന്ത്രിക്കെതിരേ നിയമനടപടി സ്വീകരിക്കണമെന്ന ആവശ്യവും ശക്തമാണ്.
സമൂഹമാധ്യമങ്ങളിൽ പ്രചരിക്കുന്ന ദൃശ്യങ്ങളിൽ വനംവകുപ്പിന്റെ സഫാരി വാഹനങ്ങളിൽ കുടുംബാംഗങ്ങൾക്കും വനംവകുപ്പ് ഉദ്യോഗസ്ഥർക്കുമൊപ്പം മന്ത്രി യാത്ര ചെയ്യുന്നത് കാണാം. ഇതിനിടെ മന്ത്രി കടുവയ്ക്കുനേരേ ഓടിയടുക്കുന്നതാണ് ദൃശ്യങ്ങളിലുള്ളത്. മറ്റൊരു വീഡിയോയിൽ മന്ത്രി കാട്ടാനയ്ക്ക് അടുത്തേക്ക് പോകുന്നതും കാണാം. എന്നാൽ, ഈ സംഭവം കർണാടകയിലെ ബന്ദിപ്പുർ കടുവാസങ്കേതത്തിലാണു നടന്നതെന്നാണ് റിപ്പോർട്ടുകൾ.
വീഡിയോകൾ പുറത്തുവന്നതോടെ 1972ലെ വന്യജീവി സംരക്ഷണ നിയമപ്രകാരം മന്ത്രിക്കെതിരേ കേസെടുക്കണമെന്ന് വന്യജീവി സംരക്ഷകർ വനംവകുപ്പിനോട് ആവശ്യപ്പെട്ടു. സഫാരി നിയമങ്ങൾ അനുസരിച്ച് സന്ദർശകർ വാഹനങ്ങളിൽനിന്ന് പുറത്തിറങ്ങാനോ വന്യമൃഗങ്ങളുടെ അടുത്തേക്ക് പോകാനോ പാടില്ല. മനുഷ്യരുടെ ഇടപെടലുകൾ ഒഴിവാക്കാനും സന്ദർശകരുടെയും മൃഗങ്ങളുടെയും സുരക്ഷ ഉറപ്പാക്കാനുമാണ് ഇത്തരം കർശന നിയന്ത്രണങ്ങൾ ഏർപ്പെടുത്തിയിരിക്കുന്നത്.
അതേസമയം, കടുവയുമായി ബന്ധപ്പെട്ട സംഭവത്തിൽ വ്യത്യസ്തമായ വിശദീകരണമാണു വനംവകുപ്പ് നൽകുന്നത്. സംരക്ഷിത വനമേഖലയ്ക്കുള്ളിലല്ല, മറിച്ച് മന്ത്രി താമസിച്ചിരുന്ന അച്ചക്കരൈയിലെ റിസോർട്ടിന്റെ ഉടമസ്ഥതയിലുള്ള ഭൂമിയിലാണ് കടുവയെ കണ്ടതെന്ന് ഉദ്യോഗസ്ഥർ വ്യക്തമാക്കി. മന്ത്രിയുടെയും കുടുംബത്തിന്റെയും സുരക്ഷ ഉറപ്പാക്കാനായാണു വനംവകുപ്പ് ഉദ്യോഗസ്ഥർ ഒപ്പം പോയതെന്നും വീഡിയോ പകർത്തുന്ന സമയത്ത് മന്ത്രി സഫാരി വാഹനത്തിൽനിന്നു പുറത്തിറങ്ങിയിട്ടില്ലെന്നും വനംവകുപ്പ് ഉദ്യോഗസ്ഥൻ വിശദീകരിച്ചു.