ന്യൂഡൽഹി: നീറ്റ് പരീക്ഷാ ക്രമക്കേടിനെതിരേ വിദ്യാർഥികൾ നടത്തിയ സമരത്തെത്തുടർന്ന് കേന്ദ്രമന്ത്രി ധർമേന്ദ്ര പ്രധാൻ രാജിവച്ചതിനു പിന്നാലെ വിദ്യാർഥികളെ അഭിനന്ദിച്ച് ചലച്ചിത്ര-വിനോദ രംഗത്തെ പ്രമുഖർ.
ധർമേന്ദ്ര പ്രധാന്റെ രാജിയെ വിദ്യാർഥികളുടെ വിജയമെന്നാണ് വിജയ് വർമ, വീർദാസ്, സ്വരഭാസ്കർ, വരുൺ ഗ്രോവർ തുടങ്ങിയ പ്രമുഖതാരങ്ങൾ വിശേഷിപ്പിച്ചത്.
സമരത്തിനു നേതൃത്വം നൽകിയ വിദ്യാർഥികളെ ഹാസ്യകാരനും എഴുത്തുകാരനുമായ വരുൺ ഗ്രോവർ അഭിനന്ദിച്ചു. ജെൻസികൾ ഭരണാധികാരികളുടെ കണ്ണുതുറപ്പിച്ചിരിക്കുന്നുവെന്ന് അദ്ദേഹം എക്സിൽ കുറിച്ചു.
ഒറ്റക്കെട്ടായി നിന്നാൽ നമ്മൾ വിജയിക്കും, ഭിന്നിച്ചാൽ തകരും - നടൻ അഭിഷേക് ബാനർജി സാമൂഹികമാധ്യമത്തിൽ കുറിച്ചു. വിദ്യാർഥികളുടെ വൻ വിജയമെന്നാണ് സ്വരഭാസ്കർ പ്രതികരിച്ചത്.
ധർമേന്ദ്ര പ്രധാന്റെ രാജിക്കത്ത് ഇൻസ്റ്റഗ്രാമിൽ പങ്കുവെച്ചാണ് നടി പാർവതി തെരുവോത്ത് വിദ്യാർഥികൾക്ക് ഐക്യദാർഢ്യം പ്രഖ്യാപിച്ചത്. സൊനാക്ഷി സിൻഹ, സംവിധായകൻ വിക്രമാദിത്യ മോട്വാനെ, ട്വിങ്കിൾ ഖന്ന തുടങ്ങിയവരും വിദ്യാർഥികളെ അഭിനന്ദിച്ച് രംഗത്തെത്തി.
E-paper LOGIN
LOGIN