ന്യൂഡൽഹി: വ്യോമ എൻജിൻ നിർമാതാക്കളായ ബ്രട്ടീഷ് കന്പനി റോൾസ് റോയിസ് ഇന്ത്യയിൽ വൻ നിക്ഷേപത്തിന് ഒരുങ്ങുന്നു. ജെറ്റ് എഞ്ചിനുകൾ, നേവൽ പ്രൊപ്പൽഷൻ, സൈനികവാഹനങ്ങൾ, അഡ്വാൻസ്ഡ് എഞ്ചിനീയറിംഗ് എന്നിവയുൾപ്പെടെ പ്രതിരോധമേഖലയിലെ മുഴുവൻ സാധ്യതയും ഉപയോഗപ്പെടുകയാണു ലക്ഷ്യമിടുന്നതെന്നു റോൾസ് റോയ്സ് ഇന്ത്യ എക്സിക്യൂട്ടീവ് വൈസ് പ്രസിഡന്റ് ശശി മുകുന്ദൻ പറഞ്ഞു.
അഡ്വാൻസ്ഡ് മീഡിയം കോംബാറ്റ് എയർക്രാഫ്റ്റ് (എഎംസിഎ) ദൗത്യത്തിന്റെ ഭാഗമായി യുദ്ധവിമാനങ്ങളുടെ കരുത്ത് വർധിപ്പിക്കുന്നതിന് വരും തലമുറ വ്യോമ എൻജിനുകൾ വികസിപ്പിക്കുന്നതിനു മുൻഗണന നൽകും. നാവികസേനാ യുദ്ധക്കപ്പലുകളുടെ പ്രഹരശേഷി ഉയർത്തുന്നതിനുള്ള സാങ്കേതികവിദ്യയിലും റോൾസ് റോയിസിനു നിർണായക പങ്കുവഹിക്കാനാകും.
ഇന്ത്യയിൽ പ്രതിരോധരംഗത്തെ രണ്ടു പൊതുമേഖലാ കന്പനികളുമായി ധാരണാപത്രത്തിൽ ഇതിനകം ഒപ്പിട്ടുകഴിഞ്ഞു. അർജുൻ ടാങ്കുകൾക്കുള്ള എൻജിൻ, അത്യാധുനിക സൈനിക വാഹനങ്ങൾക്കുള്ള എൻജിൻ എന്നിവയുടെ നിർമാണത്തിനുള്ള ധാരണാ പത്രമാണ് ഒപ്പിട്ടിരിക്കുന്നത്-അദ്ദേഹം പറഞ്ഞു.