തിരുവനന്തപുരം: സംസ്ഥാന നിയമസഭയിലേക്ക് തെരഞ്ഞെടുക്കപ്പെട്ട 11 വനിതാ ജനപ്രതിനിധികൾക്കുള്ള ആദരസൂചകമായി സപ്ലൈകോ നടപ്പാക്കിയ ‘വിമൻസ് 11’ ഓഫറിന് വൻ പ്രതികരണം.
മേയ് 11 മുതൽ 11 ദിവസത്തേക്ക് നൽകിയ ഓഫറിൽ 1,77,476 വനിത ഉപഭോക്താക്കളാണ് സാധനങ്ങൾ വാങ്ങിയത്. രണ്ടര കോടി രൂപയുടെ 11 ശബരി ഉത്പന്നങ്ങളാണ് മേയ് 21 വരെ നടത്തിയ ഈ ഓഫർ മുഖേന ജനങ്ങളിലേക്ക് എത്തിയത്.
ശബരി വെളിച്ചെണ്ണ, അപ്പം പൊടി, പുട്ടുപൊടി, ഉപ്പ്, മഞ്ഞൾപൊടി, മുളകുപൊടി, മല്ലിപ്പൊടി, കടുക്, ജീരകം, ശബരി ഗോൾഡ് ചായപ്പൊടി, ഹോട്ടൽ ബ്ലെൻഡ് ചായപ്പൊടി എന്നിവയാണ് 11 ശതമാനം വിലക്കുറവിൽ വനിതാ ഉപഭോക്താക്കൾക്ക് നൽകിയത്.
ഇവയിൽ ശബരി വെളിച്ചെണ്ണയ്ക്കാണ് കൂടുതൽ ആവശ്യക്കാരുണ്ടായിരുന്നത്. 85,000 ലിറ്റർ ശബരി വെളിച്ചെണ്ണയും 35 ടണ്ണോളം ശബരി പുട്ടുപൊടിയും അപ്പം പൊടിയുമാണ് ഈ ഓഫറിൽ ഉപഭോക്താക്കൾ വാങ്ങിയത്.
വനിതാ നേതൃത്വത്തെ ആദരിക്കുന്നതോടൊപ്പം, സ്ത്രീകൾ വീടുകളിലും സമൂഹത്തിലും വഹിക്കുന്ന നിർണായക പങ്കിനെയും ഉയർത്തിക്കാട്ടുകയായിരുന്നു ഈ പദ്ധതിയുടെ ലക്ഷ്യം.