കൊച്ചി: ശബരിമലയിൽ വെർച്വൽ ക്യൂ, സ്പോട്ട് ബുക്കിംഗ് വഴി ദർശനത്തിന് ബുക്ക് ചെയ്യുന്നവരിൽ പകുതിയോളം പേർ മാത്രമാണ് സന്നിധാനത്ത് എത്തുന്നതെന്ന് മന്ത്രി കെ.മുരളീധരൻ. സ്പോട്ട് ബുക്കിംഗ് നടത്തുന്നവരിൽ പലരും ദർശനത്തിനെത്തുന്നില്ലെന്നും ഏജൻസികൾ കൂട്ടത്തോടെ ബുക്കിംഗ് നടത്തുന്നുണ്ടോയെന്ന് പരിശോധിക്കുമെന്നും മന്ത്രി വ്യക്തമാക്കി.
ദർശനത്തിനായി 5,000 സ്ലോട്ടുകൾ കൂടി അനുവദിക്കുന്ന കാര്യം പരിഗണനയിലുണ്ടെന്നും ഇതിനായി ഹൈക്കോടതിയുടെ അനുമതി തേടിയിട്ടുണ്ടെന്നും അദ്ദേഹം പറഞ്ഞു. അതേസമയം ശബരിമലയിൽ തീർഥാടകരുടെ എണ്ണത്തിൽ വർധന രേഖപ്പെടുത്തി. വൈകുന്നേരം നാലു വരെ 42,958 പേരാണ് സന്നിധാനത്ത് ദർശനം നടത്തിയത്. കഴിഞ്ഞ ദിവസം 80,000 പേർക്ക് ദർശനത്തിന് അനുമതിയുണ്ടായിരുന്നെങ്കിലും 37,000 പേർ മാത്രമാണ് എത്തിയത്.
നിലവിൽ പ്രതിദിനം 80,000 പേർക്കാണ് ശബരിമലയിൽ ദർശനത്തിന് അനുമതിയുള്ളത്. ഇതിൽ 66,000 പേർക്ക് വെർച്വൽ ക്യൂ വഴിയും 14,000 പേർക്ക് സ്പോട്ട് ബുക്കിംഗ് വഴിയുമാണ് പ്രവേശനം. മണ്ഡല-മകരവിളക്ക് തീർഥാടനം ആരംഭിച്ചതിന് പിന്നാലെ വെർച്വൽ ക്യൂവിലെ മുഴുവൻ സ്ലോട്ടുകളും ബുക്കിംഗ് പൂർത്തിയായിട്ടുണ്ട്.
ഡിസംബർ 25 വരെ വെർച്വൽ ക്യൂവിൽ സ്ലോട്ടുകൾ ഒഴിവില്ലാത്ത സാഹചര്യവുമുണ്ട്. എന്നാൽ ബുക്ക് ചെയ്യുന്നവരിൽ പകുതിയോളം പേർ മാത്രമാണ് യഥാർഥത്തിൽ ദർശനത്തിനെത്തുന്നത്. ചില സീസണുകളിലെ ആദ്യ ദിവസങ്ങളിൽ തീർഥാടകരുടെ എണ്ണം കുറയാറുണ്ടെന്നും ബുക്ക് ചെയ്ത എല്ലാവരും ദർശനത്തിനെത്തണമെന്നില്ലെന്നും അധികൃതർ ചൂണ്ടിക്കാട്ടുന്നു.
അതേസമയം ബുക്കിംഗ് ഏജന്റുമാരുടെ ഇടപെടലാണ് ഇതിന് പിന്നിലെന്ന വാദം ശബരിമല സ്പെഷ്യൽ ഓഫീസർ തള്ളി. സാഹചര്യം വിശദമായി പരിശോധിക്കാൻ ദേവസ്വം ബോർഡ് പ്രസിഡന്റ് ഇന്റലിജൻസ് വിഭാഗത്തിന് നിർദേശം നൽകിയിട്ടുണ്ട്.