ലക്നോ: ഗോമതിനഗറിലെ സഹാറ സിറ്റിയിൽ ആഡംബര വീടുകളിൽ കവർച്ച നടത്തിയ ആറംഗ സംഘം പിടിയിൽ. ഫയാസ്, നൂർ മുഹമ്മദ്, അമൻ സാഹ്നി, ഡാനിഷ്, ഷാഹിദ്, വിക്രം എന്നിവരാണ് പ്രതികൾ.
ആക്രി കച്ചവടക്കാർ എന്ന വ്യാജേനയാണ് പ്രതികൾ കഴിഞ്ഞ കുറച്ചു വർഷങ്ങളായി പ്രവർത്തിച്ചിരുന്നത്. പകൽ സമയങ്ങളിൽ ആക്രി പെറുക്കാൻ എന്ന വ്യാജേന വിവിധയിടങ്ങളിൽ പോയി മോഷണം നടത്തേണ്ട വീടുകൾ ഇവർ മുൻകൂട്ടി നിശ്ചയിക്കും. രാത്രികാലങ്ങളിൽ സഹാറ സിറ്റിയിലെ മതിൽ ചാടിക്കടന്നാണ് വീടുകളിൽ കയറിയിരുന്നത്.
വിലപിടിപ്പുള്ള ഇലക്ട്രോണിക് ഉപകരണങ്ങൾ, സ്വർണാഭരണങ്ങൾ, വിലകൂടിയ വാച്ചുകൾ എന്നിവയാണ് പ്രധാനമായും മോഷ്ടിച്ചിരുന്നത്. മോഷണം നടത്തുന്ന വസ്തുക്കൾ ഒരു പിക്ക് അപ്പ് വാനിൽ കയറ്റിയാണ് കടത്തിയിരുന്നത്. ഇവ വിറ്റ് കിട്ടുന്ന പണം ആറ് പേരും കൂടി വീതിച്ചെടുകയും ചെയ്യുമെന്ന് പോലീസ് പറഞ്ഞു.
സഹാറ സിറ്റിയിലെ നിരവധി വീടുകളിൽ മോഷണം നടത്തിയ പ്രതികളെ പോലീസ് അറസ്റ്റ് ചെയ്തിട്ടുണ്ട്.