ചാത്തന്നൂർ: കേരളത്തിലെ സിബിഎസ്ഇ സ്കൂളുകളുടെ സഹോദയ സംസ്ഥാന കലോത്സവത്തിൽ കാരംകോട് വിമല സെൻട്രൽ സ്കൂളിന് ശ്രദ്ധേയമായ നേട്ടം. ഒപ്പന, സംഘനൃത്തം, മൂകാഭിനയം തുടങ്ങിയ ഗ്രൂപ്പിനങ്ങളിലും വിവിധ നോൺ സ്റ്റേജ് ഇനങ്ങളിലും വിദ്യാർഥികൾ എ ഗ്രേഡ് കരസ്ഥമാക്കി. വിദ്യാർഥികളുടെ സർഗാത്മക കഴിവിനും കഠിനാധ്വാനത്തിനുമുള്ള അംഗീകാരമായി മാറിയ ഈ നേട്ടത്തിൽ സ്കൂൾ ഡയറക്ടർ ഫാ. വർഗീസ് കരിമ്പാലിൽ, അസിസ്റ്റന്റ് ഡയറക്ടർ ഫാ. ജെറിൻതുണ്ടിൽ, പ്രിൻസിപ്പൽ ടോം മാത്യു, വൈസ് പ്രിൻസിപ്പൽ എബി എബ്രഹാം തുടങ്ങിയവർ ടീമിനെ അഭിനന്ദിച്ചു.