വത്തിക്കാൻ സിറ്റി: വത്തിക്കാനിലെ സെന്‍റ് പീറ്റേഴ്സ് ബസിലിക്കയുടെ 400-ാം പ്രതിഷ്ഠ വാർഷികാഘോഷങ്ങളുടെ ഭാഗമായി വിശുദ്ധ പത്രോസിന്‍റെ കബറിട ചരിത്രം അനാവരണം ചെയ്യുന്ന പുതിയ ഡോക്യുമെന്‍ററി ‘പെട്രോസ് എനി: ഡിസ്കവറിംഗ് ദ ഒറിജിൻസ്’ റിലീസിനൊരുങ്ങുന്നു.
പ്രശസ്ത ഹോളിവുഡ് താരം ക്രിസ് പ്രാറ്റ് അവതാരകനാകുന്ന ഈ ചിത്രത്തിൽ ലെയോ പതിനാലാമൻ മാർപാപ്പ നേരിട്ടു കാമറയ്ക്കു മുന്നിലെത്തുന്നുവെന്ന വലിയ സവിശേഷതയുമുണ്ട്. റോം ഫിലിം ഫെസ്റ്റിവലിന്‍റെ ഭാഗമായി ഇന്നലെ പ്രദർശിപ്പിച്ച ഈ ചിത്രം വത്തിക്കാന്‍റെ ഭൂഗർഭ കല്ലറകളിലെ ഇതുവരെ കാണാത്ത അപൂർവ ദൃശ്യങ്ങളാണ് പ്രേക്ഷകർക്കു മുന്നിൽ തുറന്നുകാട്ടുന്നത്.
വലിയനോമ്പ് കാലമായ 2027 ഫെബ്രുവരിയിൽ ചിത്രം അന്താരാഷ്‌ട്രതലത്തിൽ തിയറ്ററുകളിൽ റിലീസ് ചെയ്യും. യുഎസ്, കാനഡ എന്നിവിടങ്ങളിൽ ഹലോ സ്റ്റുഡിയോസും സ്പെയിനിൽ ബോസ്കോ ഫിലിംസും ലാറ്റിനമേരിക്കൻ രാജ്യങ്ങളിൽ സിനെപോളിസുമാണ് ചിത്രം തിയറ്ററുകളിലെത്തിക്കുന്നത്.
പത്രോസ് ഇവിടെയുണ്ട്!
അപ്പസ്തോലനായ വിശുദ്ധ പത്രോസിന്‍റെ കബറിടത്തിനു സമീപത്തുനിന്ന് പുരാവസ്തു ഗവേഷകർ കണ്ടെത്തിയ ഗ്രീക്ക് ലിഖിതത്തിൽനിന്നാണ് ചിത്രത്തിന് ‘പെട്രോസ് എനി’ എന്ന പേര് ലഭിച്ചത്. ‘പത്രോസ് ഇവിടെയുണ്ട്’ എന്നാണ് ‘പെട്രോസ് എനി’ എന്ന വാക്കുകളുടെ അർഥം.
‘ഗാർഡിയൻസ് ഓഫ് ദ ഗാലക്സി’, ‘ജുറാസിക് വേൾഡ്’ എന്നീ ചിത്രങ്ങളിലൂടെ ലോകമെമ്പാടും ആരാധകരെ സൃഷ്‌ടിച്ച ക്രിസ് പ്രാറ്റാണ് പ്രേക്ഷകരെ ബസിലിക്കയുടെ ഭൂഗർഭ അറകളിലേക്കു നയിക്കുന്നത്. പൊതുജനങ്ങൾക്ക് അപൂർവമായി മാത്രം പ്രവേശനമുള്ള ഈ രഹസ്യവഴികളിലൂടെയുള്ള യാത്ര ചിത്രം അവിസ്മരണീയമാക്കുന്നു.
സെന്‍റ് പീറ്റേഴ്സ് ബസിലിക്കയുടെ 400-ാം പ്രതിഷ്ഠ വാർഷികവേളയിൽ ചരിത്രവും വിശ്വാസവും ശാസ്ത്രവും കൂട്ടിയിണക്കുന്ന ഈ ഡോക്യുമെന്‍ററി ലോകമെമ്പാടുമുള്ള ചലച്ചിത്ര-ചരിത്ര പ്രേമികൾക്ക് ഒരു അപൂർവ ദൃശ്യവിരുന്നായിരിക്കും.
ചരിത്രത്തിലൂടെയും പുരാവസ്തു ഗവേഷണത്തിലൂടെയും ഒരു യാത്ര
ഗലീലിയിലെ സാധാരണക്കാരനായ മീൻപിടിത്തക്കാരനിൽനിന്ന് ഈശോമിശിഹാ സ്ഥാപിച്ച സഭയുടെ അമരക്കാരനായി മാറിയ പത്രോസിന്‍റെ പരിണാമമാണ് ചിത്രത്തിന്‍റെ പ്രമേയം. നീറോ ചക്രവർത്തിയുടെ ഭരണകാലത്ത് റോമിൽ രക്തസാക്ഷിത്വം വരിച്ച പത്രോസിനെ അടക്കം ചെയ്ത വത്തിക്കാൻ കുന്നുകൾ പിൽക്കാലത്ത് ക്രിസ്തുമത വിശ്വാസികളുടെ പ്രധാന തീർഥാടനകേന്ദ്രമായി മാറി.
നാലാം നൂറ്റാണ്ടിൽ ക്രിസ്തുമതം സ്വീകരിച്ച ആദ്യ റോമൻ ചക്രവർത്തിയായ കോൺസ്റ്റന്‍റൈൻ, പത്രോസിന്‍റെ കല്ലറ സംരക്ഷിക്കുന്നതിനായി അവിടെ ആദ്യത്തെ ബസിലിക്ക നിർമിക്കാൻ ഉത്തരവിട്ടു. കല്ലറ അതേപടി സംരക്ഷിച്ചുകൊണ്ട് പണിതുയർത്തിയ ഈ ചരിത്രഭൂമിയിലാണ് പിൽക്കാലത്ത് വിഖ്യാത ശില്പി ജിയാൻ ലൊറേൻസോ ബെർണിനിയുടെ രൂപകല്പനയിൽ ഇപ്പോഴത്തെ മനോഹരമായ സെന്‍റ് പീറ്റേഴ്സ് ബസിലിക്ക ഉയർന്നുവന്നത്.
ഡോക്യുമെന്‍ററിയുടെ അവസാന ഭാഗങ്ങളിൽ പ്രത്യക്ഷപ്പെടുന്ന ലെയോ പതിനാലാമൻ മാർപാപ്പ, വിശുദ്ധ പത്രോസിന്‍റെ വ്യക്തിത്വത്തെക്കുറിച്ചും കബറിടത്തിന്‍റെ ആത്മീയ പ്രാധാന്യത്തെക്കുറിച്ചും വിശദീകരിക്കുന്നു.
മാർപാപ്പയോടും വത്തിക്കാനോടൊപ്പവും ഈ പദ്ധതിയിൽ പങ്കാളിയാകാൻ കഴിഞ്ഞത് വലിയൊരു ഭാഗ്യമായി കരുതുന്നതായും, വിശുദ്ധ പത്രോസിന്‍റെ ജീവിതം ക്രിസ്തീയവിശ്വാസത്തിന്‍റെ ആണിക്കല്ലാണെന്നും ക്രിസ് പ്രാറ്റ് പറഞ്ഞു.
സ്പാനിഷ് സംവിധായിക പൗള ഓർട്ടിസ് സംവിധാനം ചെയ്ത ചിത്രത്തിന്‍റെ തിരക്കഥ വത്തിക്കാൻ മീഡിയയുടെ എഡിറ്റോറിയൽ ഡയറക്‌ടർ ആന്ദ്രിയ തൊർണിയല്ലിയുടേതാണ്.
വത്തിക്കാൻ കല്ലറയിലെ പുരാവസ്തു വിദഗ്ധനായ പിയത്രോ സാണ്ടറിന്‍റെ മേൽനോട്ടത്തിലാണു ചരിത്രവസ്തുതകൾ ക്രോഡീകരിച്ചിരിക്കുന്നത്. എഎഫ് ഫിലിംസ്, വത്തിക്കാൻ മീഡിയ, ഫാബ്രിക് ഓഫ് സെന്‍റ് പീറ്റർ എന്നിവർ ചേർന്നാണു നിർമാണം.
Deepika
Corehub Solutions
E-paper LOGIN
LOGIN
