വാഷിംഗ്ടണ്: പശ്ചിമേഷ്യന് സംഘര്ഷത്തിനു പിന്നാലെ എണ്ണവില കുതിക്കുന്നു. ആഗോളവിപണിയില് ക്രൂഡ് ഓയില് വില ബാരലിന് 7.4 ശതമാനം ഉയര്ന്ന് 71.97 ഡോളറിലെത്തി.
ഇന്ത്യ ഉള്പ്പടെയുള്ള രാജ്യങ്ങള് ഉപയോഗിക്കുന്ന ബ്രെന്റ് ക്രൂഡിന്റെ വില 7.7 ശതമാനം ഉയര്ന്ന് 78.42 ഡോളറായി. പ്രധാന എണ്ണവിതരണ മാര്ഗമായ ഹോര്മുസ് കടലിടുക്കിനു സമീപം കപ്പലുകള് ആക്രമിക്കപ്പെട്ടതിനെത്തുടര്ന്നാണ് എണ്ണവില കുതിച്ചുയര്ന്നത്.
ഇറേനിയന് ഡ്രോണുകള് ആക്രമിക്കുമെന്ന ആശങ്കയെത്തുടര്ന്നു സൗദി അരാംകോ ദമ്മാമിനടുത്തുള്ള റാസ് തനുര എണ്ണ ശുദ്ധീകരണശാല ഇന്നലെ താത്കാലികമായി അടച്ചു.
എണ്ണ ശുദ്ധീകരണശാല ലക്ഷ്യമാക്കിയെത്തിയ ഡ്രോണുകള് വീഴ്ത്തിയതായി സൗദി അധികൃതര് പറഞ്ഞു. പ്രതിദിനം അര ദശലക്ഷം ബാരലിലധികം അസംസ്കൃത എണ്ണ ഇവിടെ ശുദ്ധീകരിക്കുന്നുണ്ട്.
ദ്രവീകൃത പ്രകൃതിവാതകത്തിന്റെ ഉത്പാദനം നിര്ത്തുമെന്ന് ഖത്തര് എനര്ജിയും ഇന്നലെ പ്രഖ്യാപിച്ചു. ഉത്പാദനം പുനഃസ്ഥാപിക്കുന്നത് സംബന്ധിച്ചുള്ള അറിയിപ്പ് ഇതുവരെ പ്രഖ്യാപിച്ചിട്ടില്ല. മേഖലയിലെ മറ്റ് എണ്ണയുത്പാദക രാജ്യങ്ങളിലേക്കും സംഘര്ഷം വ്യാപിക്കുമോ എന്നതിലാണ് വിപണി ശ്രദ്ധ കേന്ദ്രീകരിച്ചിരിക്കുന്നത്.
എന്നാല് സംഘര്ഷം അവസാനിച്ചാല് വളരെ വേഗംതന്നെ എണ്ണവില സാധാരണനിലയിലാകുമെന്നാണ് വിദഗ്ധര് പറയുന്നത്.
E-paper LOGIN
LOGIN
