ബോളിവുഡ് ചിത്രം രാമായണത്തിൽ സീതയായി വേഷമിടാനൊരുങ്ങുന്ന നടി സായ് പല്ലവിക്കെതിരെ വ്യാപക വിമർശനം ശക്തമാകുന്നു. നടിക്ക് ഹിന്ദി സംസാരിക്കാൻ അറിയില്ലെന്നതാണ് ഒരു വിഭാഗത്തെ ചൊടുപ്പിച്ചത്.
ഏക് ദിൻ പ്രചാരണ പരിപാടിക്കിടെ സായ് പല്ലവി ഹിന്ദി സംസാരിക്കാൻ ബുദ്ധിമുട്ടിയതാണ് കാരണം.
ആമിർ ഖാൻ നിർമിച്ച് ജുനൈദ് ഖാൻ നായകനാകുന്ന ഏക് ദിൻ എന്ന ചിത്രത്തിന്റെ പ്രമോഷന്റെ ഭാഗമായി മുംബൈയിൽ സംഘടിപ്പിച്ച ഏക് ദിൻ കി മെഹ്ഫിൽ എന്ന പരിപാടിക്കിടെയായിരുന്നു സംഭവം.
വേദിയിലുള്ളവരെ അഭിസംബോധന ചെയ്യവേ തനിക്ക് ഹിന്ദി അത്ര വശമില്ലെന്ന് സായ് പല്ലവി തുറന്നു സമ്മതിച്ചിരുന്നു.
ചിരിച്ചുകൊണ്ട് ലളിതമായ രീതിയിലാണ് താരം ഇത് പറഞ്ഞതെങ്കിലും, വീഡിയോ പുറത്തുവന്നതോടെ വിമർശകർ ഇത് ആയുധമാക്കുകയായിരുന്നു.
‘‘അടിസ്ഥാനപരമായ ഹിന്ദി വാക്കുകൾ പോലും സംസാരിക്കാൻ അറിയാത്ത സായ് പല്ലവിയാണോ സീതയായി അഭിനയിക്കുന്നത്?’’എന്നാണ് സോഷ്യൽ മീഡിയയിലെ ചോദ്യം.
ചിത്രത്തിൽ സായ് പല്ലവിക്ക് വേണ്ടി മറ്റാരെങ്കിലും ഡബ്ബ് ചെയ്യേണ്ടി വരുമോ എന്ന ആശങ്കയും ചിലർ പങ്കുവച്ചു.
അതേസമയം, നടിക്കെതിരെയുള്ള സൈബർ ആക്രമണത്തെ പ്രതിരോധിച്ചുകൊണ്ട് നിരവധി പേർ രംഗത്തെത്തിയിട്ടുണ്ട്. അഭിനയവും ഭാഷാ വൈദഗ്ധ്യവും രണ്ടല്ലേ എന്നാണ് ആരാധകരുടെ ചോദ്യം.
‘‘കത്രീന കൈഫും ജാക്വിലിൻ ഫെർണാണ്ടസും വർഷങ്ങളായി ബോളിവുഡിൽ നിൽക്കുന്നത് ഹിന്ദി അറിയാതെയല്ലേ? അന്ന് ഇല്ലാത്ത എന്ത് പ്രശ്നമാണ് ഇപ്പോൾ സായ് പല്ലവിയുടെ കാര്യത്തിലുള്ളത്?’’ എന്ന് ചിലർ ചോദിക്കുന്നു.
ഗായകർ അന്യഭാഷകളിൽ പാടുന്നത് പോലെ നടീനടന്മാർക്ക് ഡയലോഗുകൾ മനഃപാഠമാക്കി കൃത്യമായി അവതരിപ്പിക്കാൻ കഴിയുമെന്നും, അഭിമുഖങ്ങളിൽ സംസാരിക്കാൻ കഴിയാത്തത് ഒരു പോരായ്മയല്ലെന്നും സിനിമാ പ്രേമികൾ ചൂണ്ടിക്കാട്ടുന്നു.