9

പൂനെ: മഹാരാഷ്ട്രയിലെ ബാരാമതി വിമാനത്താവളത്തിൽ പരിശീലന പറക്കലിനിടെ സ്വകാര്യ വിമാനം റൺവേയിൽനിന്ന് തെന്നിമാറി. വിമാനത്തിലുണ്ടായിരുന്ന രണ്ട് പൈലറ്റുമാരും പരിക്കുകളൊന്നുമില്ലാതെ അത്ഭുതകരമായി രക്ഷപ്പെട്ടു. ഇരുവരും പൂർണ്ണമായും സുരക്ഷിതരാണെന്ന് അധികൃതർ സ്ഥിരീകരിച്ചു.

ഞായറാഴ്ച ഉച്ചയ്ക്ക് 12.35 ഓടെയായിരുന്നു സംഭവം. പരിശീലന പറക്കലിനായി പുറപ്പെട്ട സ്വകാര്യ കമ്പനിയുടെ വിടി-എസ്ഇഎക്സ് എന്ന വിമാനമാണ് അപകടത്തിൽപ്പെട്ടത്. ടേക്ക് ഓഫിനുള്ള ശ്രമത്തിനിടെ സാങ്കേതിക തടസത്തെ തുടർന്ന് വിമാനം നിയന്ത്രിക്കാൻ കഴിയാതെ വരികയായിരുന്നു.

തുടർന്ന് റൺവേയിൽ നിർത്താൻ സാധിക്കാതെ വന്നതോടെ വിമാനം റൺവേയുടെ പുറത്തേക്ക് തെന്നിമാറി. അപകടത്തിൽ വിമാനത്തിന് സാരമായ കേടുപാടുകൾ സംഭവിച്ചിട്ടുണ്ട്.

ക്യാപ്റ്റൻ ചിരാഗ് ശശികാന്ത്, കേഡറ്റ് അഭിജിത് ജുന്ദ്ര എന്നിവരാണ് അപകടസമയത്ത് വിമാനത്തിലുണ്ടായിരുന്നത്. ഇരുവർക്കും പരിക്കുകളൊന്നും സംഭവിച്ചിട്ടില്ലെന്ന് മുതിർന്ന പോലീസ് ഉദ്യോഗസ്ഥനായ സന്ദീപ് സിംഗ് ഗിൽവ്യക്തമാക്കി. സംഭവത്തെക്കുറിച്ച് കൂടുതൽ അന്വേഷണം ആരംഭിച്ചിട്ടുണ്ട്.