തൃപ്പൂണിത്തുറ: ഹിൽപാലസിൽ സെക്യൂരിറ്റി ഉദ്യോഗസ്ഥനായ പോലീസുകാരനിൽനിന്ന് അധിക്ഷേപം നേരിട്ടതിനെ തുടർന്ന് മ്യൂസിയം സന്ദർശിക്കാതെ മടങ്ങിയ കോട്ടയം സ്നേഹക്കൂട് അഭയമന്ദിരത്തിലെ അച്ഛനമ്മമാർ സർക്കാരിന്റെ അതിഥികളായി ഹിൽപാലസ് മ്യൂസിയം സന്ദർശിച്ചു.
വെള്ളിയാഴ്ച രാവിലെ 10 ഓടെ മ്യൂസിയത്തിലെത്തിയ ഇവരെ സ്വീകരിച്ചത് മന്ത്രി കടന്നപ്പിള്ളി രാമചന്ദ്രനായിരുന്നു. മന്ത്രിക്കൊപ്പം മ്യൂസിയം നടന്നുകണ്ട സംഘം മനം നിറഞ്ഞ സന്തോഷത്തോടെയാണ് മ്യൂസിയത്തിലെ കാഴ്ചകൾ ആസ്വദിച്ചത്.
തുടർന്ന് മ്യൂസിയം ഹാളിൽ ഒരുക്കിയ ചടങ്ങിൽ അന്തേവാസികളായ തങ്കമ്മയ്ക്കും വർഗീസിനുമൊപ്പം മന്ത്രി കേക്ക് മുറിച്ച് മധുരം പങ്കിട്ടു. സംഘാംഗങ്ങൾ വിവിധ കലാപരിപാടികളും അവതരിപ്പിച്ചു.
ഇവർക്കായി പാട്ടുപാടിയും ചിത്രമെടുത്തുമാണ് മന്ത്രി മടങ്ങിയത്. സ്നേഹക്കൂട് ഡയറക്ടർ നിഷ സ്നേഹക്കൂടിന്റെ നേതൃത്വത്തിലാണ് സംഘം മ്യൂസിയം സന്ദർശിക്കാനെത്തിയത്. സിപിഎം ജില്ലാ കമ്മിറ്റിയംഗം ജയ്ക് സി. തോമസും ഇവർക്കൊപ്പമുണ്ടായിരുന്നു.
വയോജനങ്ങളെ ചേർത്തു പിടിക്കുന്നതാണ് സർക്കാരിന്റെ ഉത്തരവാദിത്വമെന്നും ഇനിയും ഇതുപോലുള്ള കൂടിക്കാഴ്്ചകൾക്ക് അവസരമൊരുക്കുമെന്നും മന്ത്രി അവർക്ക് വാക്കുകൊടുത്തു.
ഒരു ഉദ്യോഗസ്ഥൻ കാണിച്ച കെടുകാര്യസ്ഥതയിൽ ആ വകുപ്പിലെ എല്ലാവരും അങ്ങനെയാണെന്ന് കരുതരുതെന്നും ഇത്തരം ഇടങ്ങളിൽ വയോജനങ്ങൾക്ക് പരിഗണനയുണ്ടാകണമെന്ന ഒരു അപേക്ഷ വന്നിട്ടുണ്ടെന്നും അത് പരിഗണനയിലാണെന്നും മന്ത്രി പറഞ്ഞു.