എസ്എൻപുരം: സമൂഹ മാധ്യമത്തിലൂടെ യുഡിഎഫിനെ അപമാനിച്ച് ചട്ടലംഘനം നടത്തിയെന്നാരോപിച്ചും ആരോപണവിധേയയായ ശ്രീനാരായണപുരം ഗ്രാമപഞ്ചായത്ത് സെക്രട്ടറി രഹന പി. ആനന്ദിനെ സർവീസിൽനിന്നു പിരിച്ചുവിടണമെന്നും ആവശ്യപ്പെട്ടു കോൺഗ്രസ് പഞ്ചായത്ത് ഓഫീസ് മാർച്ച് നടത്തി. കോൺഗ്രസ് എസ്എൻപുരം മണ്ഡലം കമ്മിറ്റിയുടെ ആഭിമുഖ്യത്തിൽ നടത്തിയ മാർച്ച് വഴിയിൽ പോലീസ് തടഞ്ഞു.
ഡിസിസി നിർവാഹകസമിതി അംഗം പി.കെ. ഷംസുദീൻ പ്രതിഷേധമാർച്ച് ഉദ്ഘാടനംചെയ്തു. മണ്ഡലം പ്രസിഡന്റ് പ്രഫ. കെ.എ. സിറാജ് അധ്യക്ഷതവഹിച്ചു. സെക്രട്ടറിക്കെതിരേ അച്ചടക്കനടപടികൾ സ്വീകരിച്ചില്ലെങ്കിൽ നിയമപരമായും രാഷ്ട്രീയപരമായും സെക്രട്ടറിക്കെതിരേ പോരാടുമെന്ന് ഷംസുദീൻ പറഞ്ഞു.
പഞ്ചായത്ത് പാർലമെന്ററി പാർട്ടി ലീഡർ കെ.ആർ. അശോകൻ, പഞ്ചായത്ത് അംഗങ്ങളായ കെ.എ. ഹൈദ്രോസ്, സുനിൽകുമാർ ചാണാടി, ഷിലു, ഫാസില അഷറഫ് തുടങ്ങിയവർ പ്രസംഗിച്ചു.