കോട്ടയം: പരിമിതികളെ മാറ്റിനിര്ത്തി ഉള്ളിലെ കഴിവുകളെ പൂക്കളാക്കി മാറ്റി അവര് ഒത്തുകൂടിയപ്പോള് മനം നിറഞ്ഞ് സ്നേഹോത്സവം. ഒടുവില് പങ്കെടുത്തവര്ക്കും മത്സരത്തില് വിജയിച്ചവര്ക്കും സ്നേഹസമ്മാനവും.
ദീപിക ബലസഖ്യവും സ്പെഷല് ഒളിമ്പിക്സ് ഭാരത് കേരളയും കോട്ടയം തിരുഹൃദയ നഴ്സിംഗ് കോളജും സംയുക്തമായി പാമ്പാടി സെന്റ് ജോണ് ഓഫ് ഗോഡ് സ്പെഷല് സ്കൂളില് സംഘടിപ്പിച്ച യൂണിഫൈഡ് സ്പെഷല് സ്കൂള് ഫെസ്റ്റ് വിദ്യാര്ഥികളുടെയും അധ്യാപകരുടെയും സജീവ പങ്കാളിത്തത്താല് ശ്രദ്ധേയമായി.
തിരുവനന്തപുരം മുതല് എറണാകുളം വരെയുള്ള ജില്ലകളിലെ നാല്പതോളം സ്പെഷല് സ്കൂളുകളില്നിന്നായി ആയിരത്തിലധികം കുരുന്നുകള് ഫെസ്റ്റില് പങ്കാളികളായി. ഭിന്നശേഷി കുട്ടികളുടെ പങ്കാളിയായി മറ്റു വിദ്യാര്ഥികള് കൂടി കൈകോര്ത്ത വീല് ചെയര് ഡാന്സ്, നാടന് പാട്ട്, കരകൗശല വസ്തു നിര്മാണം, നാടോടിനൃത്തം, സംഘനൃത്തം, ഫാഷന് ഷോ, ചെണ്ടമേളം, ടാബ്ലോ, പ്രസംഗം, സിനിമാറ്റിക് ഡാന്സ് എന്നിങ്ങനെയായിരുന്നു മത്സരങ്ങള്.
ഫെസ്റ്റില് 172 പോയിന്റ് നേടി ഏറ്റുമാനൂര് സാന്ജോസ് വിദ്യാലയ ഒന്നാം സ്ഥാനവും 92 പോയിന്റ് നേടി പത്തനംതിട്ട എംജിഎം ബഥനി ശാന്തി ഭവന് സ്പെഷല് സ്കൂള് രണ്ടാം സ്ഥാനവും 82 പോയിന്റ് നേടി പാലാ സ്നേഹാരാം സ്പെഷല് സ്കൂള് മൂന്നാം സ്ഥാനവും കരസ്ഥമാക്കി.
വൈകുന്നേരം നടന്ന സമാപന സമ്മേളനത്തില് ഡിസിഎല് കൊച്ചേട്ടനും സ്പെഷല് ഒളിമ്പിക്സ് ഭാരത് കേരളയുടെ ഡയറക്ടറുമായ ഫാ. റോയി കണ്ണന്ചിറ സിഎംഐ ആമുഖപ്രസംഗം നടത്തി. ദീപിക അഡ്മിനിസ്ട്രേഷന് ജനറല് മാനേജര് ഫാ. രഞ്ജിത്ത് ആലുങ്കല് ഉദ്ഘാടനം ചെയ്തു. ഭിന്നശേഷി സംഘടന ചെയര്മാന് ഫാ. റോയി വടക്കേല് മുഖ്യപ്രഭാഷണം നടത്തി.
സ്പെഷല് ഒളിംപിക്സ് ഭാരത് നേതാക്കളായ ജയ് കപൂര്, ശിവം നൗട്ടിയാല്, പ്രഭാകര്, ഡോ. അമീന്, സെന്റ് ജോണ് ഓഫ് ഗോഡ് സെന്റര് ഡയറക്ടര് ഫാ. ഫ്രാന്സിസ് മന്നംപറമ്പില്, എസ്ഒബി കേരള പ്രോഗ്രാം മാനേജര് സിസ്റ്റര് റാണി ജോ എന്നിവര് പ്രസംഗിച്ചു. ഡിസില് നാഷണല് കോ- ഒാര്ഡിനേറ്റര് വര്ഗീസ് കൊച്ചുകുന്നേല് സ്വാഗതവും ഓഫീസ് അഡ്മിനിസ്ട്രേറ്റര് പി.എം. ബിജു നന്ദിയും പറഞ്ഞു.
പരിപാടികള്ക്ക് കാഞ്ഞിരപ്പള്ളി അമല് ജ്യോതി കോളജ് ഓഫ് എന്ജിനിയറിഗിലെ അസിസ്റ്റന്റ് പ്രഫസര് ബിനുമോന്, സിനോ ആന്റണി, അമ്മു, സെന്റ് ജോൺ ഓഫ് ഗോഡ് പ്രിന്സിപ്പല് ദീപു ജോണ്, തിരുഹൃദയ നഴ്സിംഗ് സ്കൂള് വൈസ് പ്രിന്സിപ്പല് സിസ്റ്റര് ജെസിലിന്, ജേക്കബ് സോജന് എന്നിവര് നേതൃത്വം നല്കി.
Deepika
E-paper LOGIN
LOGIN
